Los asturianos llevamos pagos cuasi dos millones d’euros por faer usu de la llibertá d’espresión dende la entrada a valir de la polémica llei

El Gobiernu español sigui defendiendo que l’envís de la Llei de Proteición pa la Seguridá Ciudadana, más conocida como llei mordaza, ye “aumentar la seguridá” pero de fechu ta saliéndo-yos francamente rentable: 131 millones d’euros en tol estáu, de los que dos correspuenden a sanciones impuestes a asturianos/as pol exerciciu de la so llibertá d’espresión.

Un comentariu nes redes sociales, una pintada, un cantar o una frase desafortunada son fácilmente catalogables como “faltes  de respetu a les Fuercies de Seguridá, desobediencia o resistencia a l’autoridá” y ye difícil protagonizar una protesta ciudadana ensin “causar desordenes o atrabancar la vía pública”, delitos estos multaos con sanciones d’ente cien y seiscientos euros, con una media de 33 multes por cada 10.000 habitantes.

El conxuntu de la sociedá asturiana, partíos políticos, sindicatos, movimientos sociales y sobro too la ciudadanía xunióse  na  refuga a una llexislación que ven como un intentu de controlar a la población al traviés del mieu, coartando’l so drechu a la protesta, pero nun hai visos de que pueda ser derogada o siquier aplicada con menor rigor, de fechu los datos evidencien que’l ritmu de multes intensificóse nes últimes feches, disparándose nos postreros meses del 2.016 y tando entá pendientes de resolvimientu numberosos xuicios por esta cuestión.

Redaición InfoAsturies

This work is licensed under a Creative Commons Attribution 4.0 International License.