La Conseyería retira 71 places de les vacantes iniciales y axudica otres 36 a docentes de fora de Asturies en comisión de servicios

Los sindicatos ANPE y SUATEA yá anunciaben a finales del cursu pasáu que les 2.722 places primeramente convocaes  –de les que 855 son a media xornada- yeren insuficientes dafechu  pa garantizar la calidá educativa nos centros asturianos, polo que l’amenorgamientu  fai prever un entamu de cursu complicáu, con munches aules ensin el profesoráu necesariu.

Esta mengua ye entá más llamativa si se tien en cuenta l’ampliu llistáu de reclamaciones de necesidaes formulaes polos equipos direutivos de los centros, que demandaben más personal docente para los sos colexos.

La non axudicación de les vacantes, amás, repercute bien negativamente nel profesoráu interín yá que, casu de finalmente ser convocaes estes places, les persones interesaes nes mesmes que tuvieren prioridá pa escoyer, yá nun podríen faelo, al séyos otorgaes yá otres vacantes, provocando que, por ausencia de planificación, persones con menos méritu llograren a posteriori places meyores que les agora axudicaes a aspirantes con meyor posición nes llistes.

Por tou ello, los sindicatos, que fueron escluyíos de tol procesu, encamienten al Sr. Conseyeru d’Educación, Genaro Alonso, a convocar un conceyu nel qu’esclariar estes circunstancies y buscar la manera de cubrir  en plazu toles places esistentes non ufiertaes, de manera que s’asegure l’entamu de cursu con normalidá, con tolos docentes nos sos puestos y tolos neños col so mayestru asignáu, n’ares d’ufiertar una educación pública de la mayor calidá posible.

Redaición InfoAsturies

This work is licensed under a Creative Commons Attribution 4.0 International License.