La ruta que siguió’l rei Alfonso II El Castu na primer pelegrinación a la tumba l’apóstol multiplicó por diez el so númberu de visitantes nos caberos diez años
L’añu pasáu rexistráronse más de 12.000 pelegrinos percorriendo el Camín Primitivu, cifra que ya s’algamó esti añu, ensin que finare entá’l branu. Esti camín ye’l más auténticu de los tres por ser el primeru, pero’l menos conocíu pola so dificultá, al incluyir abondos tramos de ruta de montaña, incluyendo dalgún peligrosu, como la subida’l Puertu’l Palu, que lu faen más abegosu que’l camín del Norte, que pasa pela costa, y que’l Francés.
El Camín Primitivu sal d’Uviéu –por aquello de “Quien va a Santiago y non al Salvador visita al criáu y non al señor”- y pasa por Les Regueres, Gráu y Salas, pa internase’n Tinéu. Nel añu 2006 namás 1.500 de los alrodiu de 100.000 pelegrinos (1,5%) que facíen al añu’l Camín de Santiago escoyíen la ruta más antigua. La mayoría – 82.000, un 82%- facíen el Camín Francés y pocu más de 5.500 pasaben pela cosa d’ Asturies pel Camín del Norte. Una década más tarde, el camín francés rexistra’l 57% de los pelegrinos, desviándose bona parte d’ellos a los caminos asturianos, multiplicándose por diez el númberu de visitantes rexistraos nel camín. La propietaria de la Pensión Tineo comenta esti espoxigue “Cuando abrimos equí, va trenta años, malpenes pasaben pelegrinos, veíes venti, trenta, yera mui raro. Agora hai montones y la hostelería del pueblu adaptóse a ello, ye’l mayor atrautivu de Tinéu” . Al tiempu apela a la comprensión de dalgunos pelegrinos, que tres d’escoyer el camín más abegosu se quexen del so escesu d’autenticidá, protestando pol mal estáu de les caleyes nos tramos nos que, como nel so paso por El Pedregal, comparten percorríu col ganao, la principal fonte d’ingresos de la fastera.
Todos los sectores implicaos coinciden en que la meyora de les cadarmes qu’atienden a los pelegrinos y la mayor implicación de les asociaciones, les alministraciones y la iniciativa privada en xeneral permitieron esti espoxigue.
Redaición InfoAsturies
This work is licensed under a Creative Commons Attribution 4.0 International License.
