Anque’l Conceyu entá nun se pronunciara, lo más probable ye qu’esti pidimientu nun llegue a denyuri. Sicasí, ye una amuesa de la situación de censura tapecía que carecemos, na que les llendes de lo “políticamente correcho” imponen la so dictadura sobro la llibertá d’espresión
Casos como’l del raperu Valtonic, deteníu pola lletra de los sos cantares, o de los cantantes Albert Pla y Francisco, que los sos conciertos en Xixón fueron suspendíos poles sos declaraciones, sentaron precedente y agora una opinión, chistosa o non, soltada nes redes nos caberos años puede complica-y la vida a cualesquier… especialmente si yes artista o quies dedicate a la política.
Eso precisamente ye lo que-yos asocedió a la banda de rock Surfin’Bichos, que ven menaciau’l so conciertu en Mieres del próximu mes d’avientu por unos tuits de Fernando Alfaro, el cantante del grupu, nos que se burllaba del entós rei d’España, Juan Carlos, el presidente español Mariano Rajoy, el Ministru d’Economía Luis de Guindos y el Ministru de Facienda Cristóbal Montoro.
Los tuits concretos daten de 2012 y 2013 y nellos Alfaro bromia cola cayida ‘l rei Juan Carlos mientres la so visita a Estáu Mayor de Defensa en 2012, escribiendo “¡Cayó’l rei! ¡Salú, camarades!” a Montoro mentalu como “Tontoro” el moñecu cenizu de los teleñecos” y de Luis De Guindos espresa que “tien voz de llistu y cara de tontu”. Tamién describe a Mariano Rajoy como’l “Cid borrachu dándose de focicu cola realidá”. Los comentarios nun son especialmente violentos nin xustifiquen de nenguna manera una cancelación del eventu, pero’l simple fechu de que’l llabor musical d’un grupu seya puestu n’entedichu yá ye un indicador del surrealista nivel de coacción que se ta algamando, lo mesmo que de l’enfotu que grupos de corte facista, apocayá cuasi desaniciaos nel nuesu país, tán coyendo nes cuenques asturianes.
Surfin’ Bichos convertióse nun grupu de cultu que, tres más de 20 años d’inactividá y apaiciones esporádiques, tornó esti branu con una xira pa remembrar el 25 aniversariu d’Hermanos carnales, un de los discos fundamentales del pop rock. El conciertu de Mieres fuere anunciáu pol Conceyu de Mieres como’l so eventu estrella de la programación cultural y pel momentu nun se pronunció no que cinca’l discutiniu.
Llucía F. Marqués
This work is licensed under a Creative Commons Attribution 4.0 International License.
