Seique l’atención na llingua materna ta recoyía na llei, sedrán pocos los rapacinos que cunten con mayestros/es que se dirixan a ellos n’asturianu na so primer etapa, de vital importancia nel so desendolcu llingüísticu
Entantu los escolinos de primaria y secundaria van finando de preparar el cabás pa la selmana que bien, la reciella d’ente cero y tres años entama’l cursu esti miércoles. 38 conceyos asturianos cuenten con escueles de cero a tres años nes qu’esti añu curiarán de más de 3.200 rapacinos, cuasi cien más que l’añu pasáu, de los que 2.053 cuntarán amás con serviciu de comedor.
Les places, como anunciaren ya los trabayadores d’estes escueles, entamen a quedar curties y la Conseyería d’Educación baraxa abrir diez aules más, con trenta especialistes más al so cargu, pero por agora, col entamu de cursu, nun tan en furrulamientu.
Nel ámbetu políticu ye un entamu semáu de dubies, ya que ta pendiente de que’l conseyeru d’Educación Genaro Alonso, presente l’informe sobre’l cambiu de modelu de xestión de les sos escueles -cumpliendo asina’l compromisu del “Principado”. Cuéntase con qu’esi documentu estudie dellos modelos de xestión. Pente ellos ta la opción de caltener l’actual, nel que, seique la competencia seya del “Principado”, la xestión efeutiva ta a cargu de cada Casa Conceyu. La otra opción ye la integración d’estes escueles na rede de la Conseyería d’ Educación, de manera qu’esta asuma’l financiamientu d’estos centros, posibilidá que defende l’Asociación d’Escueles Infantiles Públiques de 0 a 3 n’ Asturies (AEIPA 0-3) asina como dellos Conceyos, como Xixón, Sieru, Llangréu o Mieres. Otru modelu sedría la formación d’un consorciu, pero esta opción ya foi descartada pol gobiernu.
Llucía F. Marqués
This work is licensed under a Creative Commons Attribution 4.0 International License.
