Mañana, 14 de febreru, los asturianos tornarán sacar los sos paragües por una escuela pública asturiana de calidá. Van facelo n’Uviéu, de magar les seis y media de la tarde.

El pasucais, al que s’anima a allegar provistos de los paragües colloraos d’escuela pública” va salir a les seis y media de la tarde y va percorrer les cais Campoamor, Doctor Casal, Melquiades Álvarez, Palacio Valdés, Plaza de la Escandalera, Fruela y Principáu.

Esta ye una más de la riestra d’actos reivindicativos en favor de la Escuela Pública y escontra los conciertos educativos que convoquen los colleutivos implicaos na defensa d’una educación digna.

La campaña de movilizaciones, qu’entamó cola concentración el pasáu 31 de xineru delantre del teatru Xovellanos (Xixón) coincide cola campaña de renovación de los conciertos.

Les últimes declaraciones del Conseyeru d’Educación, xustificando la privatización del sistema educativu por aciu los conciertos con centros privaos, faen tarrecer que la Resolución cola que vamos atopar va ser continuista col modelu anterior y más privatizadora si ye posible.

Anguañu,  práuticamente un terciu de la ufierta total educativa asturiana atopase’n manes de la privada-concertada, con conceyos, como Uviéu, onde esti sector cubre un 55% de la demanda educativa, o Xixón, onde representa’l 32% de les places escolares. Al tiempu que los colexos públicos, a mercé de los retayos n’educación, vieron esti añu amenorgaes les sos unidaes y medios, los centros privaos-concertaos non solo nun se vieron perxudicaos, sinón qu’amontaron notablemente’l so profesoráu.

Los manifestantes aboguen por una desapaición paulatina de la concertación, postura sofitada por Andecha Astur, I.O y Xixón si Puede.

Andecha Mocedá aprofita la convocatoria pa recalcar na necesidá d’avanzar escontra un modelu propiu d’Educación Pública Asturiana, encontada na llingua y cultura de Asturies y con referentes culturales respetuosos cola identidá asturiana,  igualitaria, solidaria, llaica y non patriarcal.

This work is licensed under a Creative Commons Attribution 4.0 International License.