Dende’l PP yá anunciaron la so intención de recurrir al TSXA, dempués de que l xulgáu Contenciosu Alministrativu númberu 1 de Xixón fallara en so contra
El Plan de Normalización Llingüística aprobáu pol Plenu en xineru del pasáu añu foi’l que motivó’l recursu presentáu pol Partíu Popular de Carreño, que llegaron a espresar el so esmolecimientu porque «Asturies podría llegar a tener la oficialidá del bable pela puerte d’atrás».
Dientru’l plan plantegábase, ente otres cuestiones, la valoración de la conocencia del asturianu a la d’aportar a puestos públicos, daqué que lleva siendo reclamao polos asturianos dende va munchos años, yá que resulta incomprensible qu’un ciudadanu nun puea ser atendíu nel so propiu idioma cuando se dirixe a l’alministración del so propiu conceyu.
Sicasí, la sentencia nun crea un precedente de reconocencia d’estes midíes, una y bones el xuez nun entra a plantegar si «ye llegal o non la valoración del asturianu nel ámbitu del emplégu públicu, nel de les sovenciones o la torna de la documentación alministrativa», sinón que se llinda a tornar el recursu énte la non obligatoriedá de les midíes recoyíes nel Plan, al escarecer ésti d’efectu venceyante.
Redaición InfoAsturies
This work is licensed under a Creative Commons Attribution 4.0 International License.
