Iniciativa pol Asturianu denuncia que nel IES Santa Cristina de L.lena hai torgues pal accesu a l’asignatura de Llingua Asturiana por falta de profesoráu
La escasez de profesoráu y les poques hores d’asturianu asignaes al centru ficieron qu’a dos escolinos del IES Santa Cristina de L.lena se yos notificare que diben ser derivaos a otra asignatura en llugar de cursar la d’asturianu qu’ellos escoyeren. Esta situación repítese davezu, pesi a que’l drechu a dar asturianu ta garantizáu pola Llei d’Usu del asturianu de 1998 y una sentencia del Tribunal Superior de Xusticia d’Asturies,
Seique tres de la denuncia paez que’l casu ta en camín de solucionase, dende Iniciativa recalquen qu’estes situaciones son endemasiao avezaes “Nun pue ser qu’un alumnu que quiera estudiar asturianu tenga que pasar per procesos de reclamación que convierten la matrícula nun actu de resistencia cívica”
Anguañu nun hai sistema de ratio mínimu d’alumnos matriculaos pa poner clases d’asturianu, pero entá son abondes les families que desconocen la sentencia que derogó esi sistema y los colexos que siguen dando esi argumentu pa negar el drechu a acceder a l’asignatura d’asturianu.
La precarización de la enseñanza del asturianu darréu los recortes n’educación fai que seyan abondos los centros que tienen escasa dotación pa impartir l’asignatura, mesmo nel sistema públicu que nos centros concertaos, habiendo contratos pal profesoráu d’asturianu que son namás d’hora y media a la semana y xuntándose grupos de Llingua Asturiana de fasta 30 escolinos d’estremaos cursos.
Redaición InfoAsturies
This work is licensed under a Creative Commons Attribution 4.0 International License.
