Los organizaores consideren un ataque a la llibertá ideolóxica, d’espresión y d’aconceyamientu  que’l Conceyu deniegue l’usu de les instalaciones municipales pa un actu nel que se diba a aldericar sobro Cataluña ya’l drechu a decidir de los pueblos

En concediendo primeramente’l permisu d’usu del espaciu y los medios téunicos del Centru Municipal del Llanu, siendo anunciáu l’actu y costeados los gastos de viaxe de los ponentes, ayeri (trés díes anantes del eventu) los organizaores recibieron un requerimientu de la conceyalía pa que “especifiquen si l’actu afaise o non a la providencia del Constitucional que prohibe’l referéndum”, demandando yos  “si ye un actu de preparación o sofitu al mesmu”

Dende la organización precisaron que, “yá que n’Asturies nun vamos votar, tampoco había intención de partir papeletes, buscar votos nin res asemeyao. Esto nun tien na que ver cola preparación del referéndum.” Faciendo notar amás que la posición del conceyu sí atenta contra la Constitución, al ser un ataque direutu a la llibertá ideolóxica, d’espresión y aconceyamientu.

Ante esos argumentos, recibieron  un nuevu resolvimientu “Onde yá nun se nos fala d’absolutamente nada de Constituciones y dízsenos que por una norma interna, el nuesu alderique nun encaxa nos actos sociales y culturales pa los que ta previstu l’usu de los centros municipales”. Daqué totalmente falso, yá que ye avezaol que los partíos entamen xuntes y esposiciones de calter políticu nestos espacios.

“Cataluña, de la Transición al Referéndum”. Ye’l títulu del actu que taba anunciáu, consistente nun alderique con xente con distintes opiniones sobro la tema, col que pretendíen enllazar la memoria hestórica cola situación que vive Cataluña. Pero al paecer, como declararon dende Andecha Ástur  “El nivel de represión sistemática, n’esti y n’otros munches temes, per parte del estáu español, ta algamando cotes propies d’una dictadura. Agora non puede falase de Cataluña. Si esto nun ye fascismu, paézse-y enforma.”

Andecha  Ástur ye, hasta’l momentu, l’únicu partíu asturianu que s’asitió claramente en defensa del SI catalán, llanzando la campaña #Asturiesdizsí en twitter.

Redaición InfoAsturies

This work is licensed under a Creative Commons Attribution 4.0 International License.