Ya van 18 espedientes a trabayaores del sindicatu CSI, principal impulsor de les movilizaciones en sofitu a los despidios de l’auxiliar de la estación d’autobuses d’ALSA en Xixón y escontra la represión del sindicalismu de clase
La empresa l.luarquesa de tresporte ALSA acumula protestes por parte de los sos trabayaores, especialmente d’aquellos que tan afiliaos al sindicatu CSI, que lleven denunciando ya hai tiempu una persecución continua con sanciones inxustificaes.
Esti sindicatu ye’l que continua coles movilizaciones de sofitu a los antiguos emplegaos de la empresa de tresporte despidíos esti añu, encargaos d’aidar nes maniobres d’entrada y salida de los autobuses. Los despidíos acusen a la empresa (qu’algamó unos 103,7 millones de beneficiu operativu en 2.016) de buscar “namás que l’aumentu de beneficios a base de precarizar l’emplegu.”
Seique por agora nun se consiguió la realmisión d’estos trabayaores, les movilizaciones (en tou casu pacifiques) lleven ya un saldu de 18 espedientes a afiliaos de la Corriente Sindical d’Izquierdes. Sicasí, esto nun asusta a los trabayaores, qu’ayeri mesmo se manifestaron delantre la Casa Sindical de Xixón y que cuenten siguir coles sos movilizaciones en sofitu a los despidios y escontra la represión del sindicalismu de clase.
Llucía F. Marqués
This work is licensed under a Creative Commons Attribution 4.0 International License.
