L’actu prohibíu por FORO cellebróse finalmente ensin dalu incidente nin interrupción de les fuercies de seguridá nel Centru Social La Manzorga

Cientos de persones manifestáronse ayeri na Plaza Mayor de Xixón en defensa de la llibertá d’espresión , depués de que fore revocada la cesión d’un espaciu municipal pa la cellebración d’una charra entitulada ‘Cataluña, de la Transición al referéndum’.

“Que se desendolcara l’actu ensin que denguna autoridá xudicial lo impidiere, ya ocurrió n’otros sitios, carganos de razón y demuestra que yera un actu llegal “, criticó Rafael Velasco, de la Federación Asturiana Memoria y República (FAMyR) y un de los organizadores del eventu. Nel alderique participaron representantes d’Esquerra Republicana, la CUP y  Catalunya en Comú.

Na protesta non sólo se criticó esta decisión concreta, sinón que se sintieron voces escontra la política represora española y la censura en xeneral, comparándose l’actual gobiernu con “una auténtica dictadura”, ya qu’esta nun ye nin de lloñe’l primer ataque a  llibertaes básiques como la d’espresión, ideoloxía o aconceyamientu, seique esta tuvo más sonadía por tar venceyada a la cuestión catalana, que como sabemos recibe más atención que cualesquier tema venceyáu a Asturies.

Redaición InfoAsturies

This work is licensed under a Creative Commons Attribution 4.0 International License.