Xixón, Uviéu y Avilés acoyeron tres manifestaciones cuasi improvisaes en reación a la situación que se ta viviendo agora mesmo nel país catalán

Demientres esperamos ver de güei  en diez díes a los catalanes papeleta en man (seique seya fecha a llápiz), dende Asturies continúen les amueses de solidaridá pa con Cataluña ya en defensa del drechu a decidir de los pueblos.

Les caberes actuaciones del Estáu español, la detención ayeri de 14 presones, la mayoría altos cargos de la Generalitat, los rexistros en departamentos, organismos, sedes polítiques, empreses y domicilios particulares, rematen lo que ya munchos definen como “un estáu d’esceición en tola regla”, con prohibición del aconceyamientu, anulación del drechu d’espresión ya incautación de medios democráticos, con usu continuu del acosu y la violencia,  midíes que desprecien ensin disimulu’l conceutu mesmu de democracia,  xeneraron tal nivel d’indignación que la población asturiana convocó, cuasi sobre la marcha, tres concentraciones nes principales ciudaes: Avilés, Xixón ya Uviéu.

L’únicu partíu que fasta l’intre y dende l’entamu defendió claramente’l SÍ catalán, Andecha Astur, reiteró nesti difícil díi’l so sofitu al Pueblu Catalán na so llucha pol Drechu a Decidir, a quienes reconoz ya la victoria, “polo menos nel ámbitu moral, por desenmazcarar cola so resistencia’l calter violentu y dictatorial del Estáu español” y recuerda que “lo que ta en xuegu nun ye solo’l futuru inmediatu de Cataluña, sinón el de tolos pueblos del Estáu , a los que se mos ñega la posibilidá democrática de decidir de forma soberana’l nuesu presente y futuru.”  Tamién comparen los fechos que se tan viviendo colos que conocimos na nuesa historia recién “Les caberes noticies falen de policíes desplazaos a millares, barcos con guardies civiles ya inclusu de tanques, una esibición de fuercia bruta que nun dexa indiferente a naide, y que recuerda a tiempos escuros”

Además de les concentraciones, n’Asturies ta en marcha la campaña a traviés de twitter #Asturiesdizsí, na que s’ afala a tolos asturianos a unviar mensaxes d’apoyu al pueblu catalán.

This work is licensed under a Creative Commons Attribution 4.0 International License.