Les dificultaes para escolarizar a la reciella ye un importante factor na perda de población de los núcleos rurales asturianos, cola consiguíente perda cultural

Iván Fernández, de 15 años, a puntu d’entamar cuartu de la ESO, percorría a diariu un kilometro y mediu a pata pa llegar a la parada del autobús escolar. La so familia cansóse. Decidieron que, mientres nun pasen a buscalu, va estudiar en casa.

La vivienda d’Iván ta a cuatro km. del institutu y anque hai autobús escolar, esti  pasa  endemasiao lloñe. Hai un taxi que recueye a los escolinos de distintos pueblos, pero dende l’añu pasáu yá nun pasa por Ronzón. Dempués de pasar tou un cursu madrugando y caminando a escures per una carretera ensin arcén, los sos padres tomaron una decisión: nun lu van unviar a clase. Depués de tomar esa decisión, dende la conseyería dixéronyos que pasaría el tasi a recoyelu, pero naide los llamó nin pasó a por elli entá.

Nun ye una situación única, nin siquier infrecuente, que los menores asturianos tengan series dificultaes p’algamar a una escolarización que, dicho seya de pasu, ye forzosa. Solo naquellos casos nos que les families llantaron cara a l’alministración buscóse solución (non siempres satisfactoria) a estos conflictos.

Munches families acaben decidiéndose por abandonar los pueblos en busca de meyores condiciones pa los sos fíos y otres nun se deciden a dir a vivir a pueblos precisamente pa nun atopase con estos problemes. Esti ye un factor importante dientro del esmolecedor fenómenu de despoblación  de los nuesos pueblos, cola consiguiente perda de toa una forma de vida, probablemente la más xunida a los raigaños asturianos. Un pasu más nel desfarrape de la nuesa identidá.

Llucía F. Marqués

This work is licensed under a Creative Commons Attribution 4.0 International License.