Los vecinos de la casa qu’amburó en Santibañez restauren n’andecha  l’edificiu, más de venti presones trabayando pa que la familia torne al llar y se reponga del sustu. Tamién tan collaborando colos afeutaos nos pagos de los materiales, alrodiu de los 9.000 €, qu’ellos solos nun podríen afrontar.

La xente de Deva abre una cuenta (ES59 3007 0100 1220 8094 2713) pa iguar la casa y sacar alantre al so vecín, ganaeru víctima d’otru incendiu,  causáu nesti casu polo que se llama “probitú enerxética”.

Los propietarios de la vivienda na que vivía un home con tres fios a piques de ser desfiuciaos permiten a la familia siguir morando nella, perdonando-yos la delda; l’asociación de plas y mas del colexu onde estudien los neños d’esta mesma familia úfrense pa pagar la renovación de carné de camión al pá, pa que puea tornar a trabayar. Anantes d’eso, foi l’aición de la xente del pueblu, convocaos pola P.A.H. lo que torgó que los echaren de casa.

En Xixón, un garrapiellu de rapazos y rapaces de la Ll.E.A ufren clases particulares de baldre pa quien nun les puea pagar. Tamién recueyen alimentos y material de llimpieza pa repartir pente los que pasen más apuros.

Una mélica en prautiques lleva material en coche, pagáu del so propiu bolsu, pa poder facer les cures en condiciones, ante la escasez de suministros nos cientros de salú.

Los escolinos d’un colexu alcuerden, ensin mediación d’adultos, poner un fondu de perres pa que naide na clas se quede ensin dir a les escursiones. Tamién merquen meriendes pa los que nun lleven.

Son namás exemplos, les amueses más visibles de los actos diarios de los asturianos supliendo la deficiente llabor de los servicios públicos, reacionando ante les necesidaes del vecín con solidaridá, que non caridá. Igual entá hai esperanza pa esti país

This work is licensed under a Creative Commons Attribution 4.0 International License.