282 sacerdotes y 21 diáconos publiquen un manifiestu defendiendo l’autodetermín de la “nación catalana”

Una nueva voz se pronuncia nel conflictu nacional catalán con motivu del referéndum del 1-O. La d’unos trescientos eclesiásticos qu’afirmen actuar “en sintonía colos nuesos obispos”, que nel pasáu mes de mayu yá emitieron un comunicáu reclamando “diálogu” col fin de reconocer la “singularidá nacional” asina como “les llexítimes aspiraciones del pueblu catalán”.

Nel manifiestu d’estos trescientos relixosos l’Estáu español ye cuestionáu por negase a “apautar les condiciones” del referéndum convocáu, yá que consideren que la so realización material ye “llexítima y necesaria”. Igualmente los roblantes llamen al pueblu católicu y a tola ciudadanía a cavilgar sobro l’actual momentu hestóricu y a “votar en conciencia n’exerciciu del drechu fundamental que tien cualisquier persona a espresar llibremente les sos posiciones”.

Nun ye una nueva esta actitú nel catolicismu catalán. Dende hai años l’obispu de Solsona, Xavier Novell, vien reivindicando un referéndum d’autodetermín, plantegando que’l «derechu de les naciones ye superior al bien moral de la unidá del Estáu».

Como reacción al manifiestu l’Estáu español treslladó la so protesta a la xerarquía vaticana. Asina l’embaxador español énte la Santa Sede, Gerardo Bugallo, apurrió en mano al secretariu d’Estáu vaticanu, el cardenal Pietro Parolin, una nota verbal de protesta. Esa nota alvierte que’l manifiestu fraya’l Códigu de Drechu Canónicu amás de los alcuerdos de 1979 ente’l Reinu d’España y la Santa Sede.

Dende 2002 nun se daba una situación asemeyada, cuando cuatro obispos vascos refugaron la illegalización de Batasuna. Porque cuando en 2006 la Conferencia Episcopal española afirmó que l’independentismu nun yera “moralmente aceptable” nun hebo por embargu nenguna protesta del Estáu español…

This work is licensed under a Creative Commons Attribution 4.0 International License.