L’empresariu, acusáu d’acosu contra una de les sos emplegaes, vióse obligáu a cerrar puertes al públicu énte la perda siguida de veceros

Tres dellos meses de boicó y movilizaciones en protesta pol tratu dáu pol propietariu de la Pastelería La Suiza a una de les sos emplegaes, que lu acusa d’acosu llaboral y sesual- l’establecimientu decidió aparar la so actividá empresarial.

Entá queden pindios de resolución numberosos xuicios, tantu llaborales como penales, derivaos de les munches denuncies interpuestes dende l’entamu de les movilizaciones en sofitu a la trabayadora, yá que a les reclamaciones iniciales fuéron sumandose les xeneraes polos ataques per parte de la redolada de la empresa a les persones que participaron nes concentraciones.

Dende la CNT Xixón, sindicatu que participó viviegamente nel resolvimientu d’esti conflictu, consideren que la respuesta del barriu del Llanu y del pueblu de Xixón foi decisiva pa demostrar que los actos d’esplotación llaboral nun queden impunes cuando hai una actuación contundente per parte de la población.

Redaición InfoAsturies

This work is licensed under a Creative Commons Attribution 4.0 International License.