El Conseyu Cívicu d’Organizaciones Populares ya Indíxenes d’Hondures, la Fundación Celestina Pérez -de Paraguai- y ASACI -d’Asturies-, opten a recibir esti añu’l galardón

El llunes nueve, una de les trés candidatures presentaes énte’l conseyu local de solidaridá va ser escoyida como merecedora del Premiu Internacional Drechos Humanos qu’otorga’l Conceyu de Sieru.

De les tres organizaciones ASACI (Asociación Asturiana pa l’Atención y Curiáu de la reciella) destaca por nun ser el de so un ámbitu qu’acostume a ser teníu en cuenta dientro’l perfil de Drechos Humanos.  ASACI compónenla un equipu de sicólogos y sicólogues con formación específica nel ámbitu de protección a la reciella, la investigación ya intervención social, qu’ufren la so atención a menores qu’esperimentaron situaciones de violencia. La importancia d’esta nominación mora na considerancia de l’atención mental como un drechu humanu.

El COSAL presentó la candidatura del Conseyu Cívicu d’Organizaciones Populares ya Indíxenes d’Hondures, COPINH, de quien se resaltó los sos aportes en mediu ambiente, igualdá de les muyeres, drechos indíxenes y la so capacidá pa crear redes a nivel internacional en defensa de la naturaleza.

La Fundación Celestina Pérez, de Paraguai, foi presentada pola Fundación Fíos del Maíz. Celestina Pérez ye una organización conocida pol so trabayu na defensa del mediu ambiente, nel ámbitu xurídicu de los drechos humanos, y na  formación.

Redaición InfoAsturies

This work is licensed under a Creative Commons Attribution 4.0 International License.