La prohibición de la Carrera pola Oficialidá de Bimenes nun torgó a la xente facer parte del recorríu  como protesta a esta decisión arbitraria por parte la delegación del gobiernu

Esti  sábadu taba convocada la cellebración d’una carrera pola oficialidá nel conceyu Bimenes. Tou taba a puntu, los materiales a repartir pente los participantes mercaos, les iscripciones pagaes, el percorríu escoyíu y preparáu con pricuru, con dos opciones –la más llarga y la cenciella- y los premios preparaos… cuando’l miércoles pasáu, a tres díes de la preba, los organizaores recibieron una carta de la delegación de gobiernu que yos denegaba’l permisu pa cellebrala.

La esculpía apurría pa torgala, “l’escesu de prebes pal mesmu díi” cai por si sola cuando se compreba que dalguna d’eses prebes –que sí se cellebraron- foron solicitaes con posterioridá a la carrera pola llingua, colo que namás puede interpretase esta denegación como un ataque más a los asturianos na llucha pola so llingua y la so identidá.

Sicasí, la xente averóse igualmente a Bimenes na fecha y hora alcordaos y amosaron el so desalcuerdu con esta desautorización percorriendo les cais del conceyu,  reclamando la oficialidá de la llingua ya’l drechu a defendela… con autorización o ensin ella.

Redaición InfoAsturies

This work is licensed under a Creative Commons Attribution 4.0 International License.