Demientres la llaceriosa situación de los díes pasaos, delles unidaes d’estinción d’incendios alcontráronse ensin los medios necesarios pa facer el so trabayu
Un videu recueye la situación d’impotencia d’una de les seis persones dedicada n’Ibias a amatar el fueu: La Unidá Militar unviada como refuerzu diz que nun pueden llevallos l’autobomba cola qu’enfrentase a la quema porque nun tienen gasolina… pocu más pueden facer que mirar comu arde la viesca.
Nun son los únicos. En Tebongo, Cangas de Narcea, los bomberos ya pidíen ayuda a media mañana pa poder poner a furrular los sos equipos “Si daquién pue apurrinos garrafes, depósitos, nos que se pueda tresportar gasoil…”. Unes hores más alantre, solucionáu esti problema, delles unidaes pidíen que se yos apurriere agua… potable, pa poder beber les persones que taben trabayando na estinción del incendiu. La situación repetíase, con mayor o menor gravedá, na mayoría los focos.
El dispositivu d’estinción, compuestu por personal de Bomberos d’Asturies y ayuntamientos, empreses forestales, la Guardería del Mediu Natural y la Unidá Militar d’Emerxencies, (UME), sumaron un total d’alrodiu d’unes 425 persones preparaes pa la emerxencia, menos d’una docena por incendiu, siendo perimportante la participación de los vecinos nel control de los mesmos. Sicasí, la falta de medios físicos fizo’l trabayu extremadamente duru y aseló enforma l’amatáu de les quemes.
Bomberos d’Asturies lleva años manifestándose pa desixir una mayor dotación, tanto de recursos humanos comu de medios pal serviciu. Na imaxe, un de los actos revindicativos d’esti cuerpu, col qu’intentaron llamar l’atención sobre la so situación.
Redaición InfoAsturies
This work is licensed under a Creative Commons Attribution 4.0 International License.
