David Castañón – www.lesfartures.com – @lesfartures
Hebo un tiempu ermu nel que la cerveza nun taba de moda, nel que tolos llocales nun sacaben la piedra vista nes parés, nin usaben palés pa incluso decorar los baños.
Hebo un tiempu nel que nun había música nos chigres, nin charres, nin alderiques culturales prestosos, hebo un tiempu nel que sintir l‘asturianu nel centru d’Uviéu fuera d‘una sidrería yera casi imposible, y qu‘Asturies casi que nin esistía pa los asturianos.
Igual nun vos alcordáis, pero yo sí. Hebo un tiempu nel que poder tomar una Guinness yera lo más grande del mundu, nel que toos naguamos por una espada Excalibur, y qu‘entramos en Paraxuga entrugando pol póster esi de los Reis d‘Asturies qu‘hai nel Ca Beleño, pa ponelo na nuesa habitación.
Tamién hebo un tiempu nel que nun esistía Twitter nin Facebook, y podías falar de tu a tu tomando una cerveza colos tos héroes qu‘escribíen los meyores artículos del mundiu na Revista “Asturies, Memoria Encesa d‘un País”, nel Ca Beleño, por supuestu. Hebo un tiempu nel qu‘escuchar música folk nun chigre yera casi imposible, y … casi lo sigue siendo. Yá escuchala en direutu nin vos cuento.
Hebo un tiempu que namoreme nel Ca Beleño (y d‘él), y desamoreme delles vegaes (d‘él, enxamás). Nel que robé besos esperando entrar nel bañu, y onde conocí a les meyores estudiantes d‘Erasmus del mundiu. Nel que xente prestosa confesome coses bones y males, y nel que ríi más que lloré, y si lloré, foi de risa.
El Ca Beleño ye eso y muncho más, y por supuestu, ye muncho más qu‘un chigre. Ye hestoria viva d‘Uviéu ya hestoria viva d‘Asturies. Pero tamién ye hestoria de mio vida. Y agora que cumplen 30 años hemos de felicitar a Franky y Blanca por 30 años de llucha, de compromisu y de facer normales munches coses que nun lo yeren. Por facer d‘un chigre un sitiu afayadizu, por facer del Ca Beleño nuesa casa. Por ser un abellugu onde arrequexanos colos de nueso, por ser llugar d‘acoyida pa los que taben siempres y pa los que llegamos nuevos.
Y por nun vivir namás del recuerdu, por siempre querer más, pensando en nós. Fai unos años camudamos la Guinness por Ordum, la so cerveza. Siendo, xunto col Espumeru, l‘unicu BrewPub n‘Asturies, esto ye, un chigre que produz la so propia cerveza pa vendela elli, apostando polo nueso ya revolucionando’l mercáu una vegada más.
Pero nun se queden ehí, agora van dar el saltu, xunto con Agua de Borines, con una planta en Piloña pa facer una gran cerveza que podamos atopar en cualesquier chigre pa toda Asturies. Dalgo complicáu y ambiciosu, pero ¿quién meyor que Franky y Blanca p‘algamalo?
¡Gracies per estos 30 años y … per munchos más!
This work is licensed under a Creative Commons Attribution 4.0 International License.
