L’Asociación d’Amigos del Horru presentó a la Xunta Xeneral del “Principado” cinco puntos pa la proteición d’estes emblemátiques edificaciones
Considerando insuficiente ya ineficaz l’actual normativa de proteición de los horros, cabazos y paneres, l’Asociación d’Amigos del Horru vien de presentar dellos puntos en pos de la so conservación “que proyeuten a estes edificaciones hacia’l futuru, metáfora como son d’Asturies”.
Nos sos puntos reclamen el reconocimientu del horru asturiano como manifestación xenuina de la Cultura Tradicional d’Asturies, creando un rexistru de los mesmos de magar tola información sobre horros presente en catálogos urbanísticos, normes subsidiaries y documentos científicos-téunicos estremaos y completáu col sofitu d’espertos nel tema.
Tamién pidin un reglamentu específicu y la creación d’una comisión dientro l’Alministración de Cultura, Urbanismu y Mediu Rural que tutele les midíes de proteición, favoreciendo qu’istituciones públiques y privaes puean destinar recursos pa la proteición, restauración y estudiu de los horros asturianos.
Toes estes propuestes alcuéntrense tamién nuna pidición en change.org, roblada ya por más de cincumil presones, a traviés de la que la población pué sofitar esta iniciativa de defensa del padrimoniu nacional arquiteutónicu.
Redaición InfoAsturies
This work is licensed under a Creative Commons Attribution 4.0 International License.
