El neñu xixonés que recibió tresplante de cordón de naciellu recupérase de la operación nel hospital del Vall d’Hebrón

El tresplante aportó a tiempu, Rubén tien 19 meses ya’l plazu másimu pa enfrentar el so síndrome taba nos dos años. La donación de Sangre de Cordón de Naciellu d’un donante estauxuniense permitió’l so tresplante medular, un procedimientu duru del que’l neñu va alicando, seique los efeutos secundarios, nel so casu una fuerte mucositis, empañen la gayola del gran pasu dau a la contra d’esta enfermedá.

El tresplante de médula nos 24 primeros meses de vida permite a los enfermos del síndrome d’Hurler tener una calidá de vida mui superior a la que tendríen ensin esta operación, lo que desplica l’enfotu puestu pola familia pa topar un donante. Nesti casu la donación aportó del otru llau de la mar, pero ye perimportante que la sociedá asturiana se conciencie de la importancia de facese donante de médula y del cordón de naciellu, una forma cenciella y ensin riesgu de salvar munches vides con un piqueñu xeitu.

N’Asturies les donaciones de médula xestiónales el centru comunitariu de sangre y texíos, llamando a esti organismu nel teléfonu  985232426 recibiremos información precisa de cómo donar, onde hai que dir y comprebarán el cumplimientu los requisitos pa llevar a cabu la donación.

Pa la donación de cordón de naciellu, el procedimientu ye tan cenciellu como roblar un consentimientu demientres l’embarazu, ya que n’Asturies esiste dende va años un bancu públicu de sangre de cordón que recueye estes donaciones y permite qu’estes célules seyan usaes por cualesquier persona que les precise. La donación nun afeuta al partu.

Llucía F. Marqués

This work is licensed under a Creative Commons Attribution 4.0 International License.