Les caberes detenciones en Catalunya y l’aplicación del artículu 155 xunen a estremaes sensibilidaes nuna concentración de refuga esta tardi a les 18:00 na Plaza la Escandalera
Pa los convocantes, les midíes tomaes en Catalunya nun tienen de ser consideraes namás como una actuación escontra’l Pueblu Catalán, sinón como un avisu de lo que mos espera a tolos pueblos baxo la xurisdición del estáu español. Les decisiones tomaes pol gobiernu nos caberos tiempos impliquen un nivel de represión y retayos de les llibertaes que deberíen esmolecer a tola población, pola deriva facista y semidictatorial que tan tomando “¿Cómo sinón definiríes a un gobiernu qu’encarcela la oposición y se fai col poder a la contra de les urnes?”
Los estremaos coleutivos sociales, sindicales y políticos que convoquen la concentración, xunios na plataforma “Asturies pol drechu a decidir”, reconocen que tienen estremaes sensibilidaes no que cinca al conflictu catalán, pero tan d’alcuerdu en que “l’aplicación del 155, con tola represión que ta conllevando y que conllevará nos prósimos meses, tien de tener una rempuesta xunitaria democrática de to@s los que creemos que los conflictos políticos nun se solucionen con represión, sinón con más política y con más democracia.”
La refuga a la represión en tol estáu, la supresión de l’aplicación artículu 155 y la lliberación de los presos políticos son los puntos prioritarios nesti intre, pero son coscientes de que nun son sinón la punta del iceberg de la represión n’España “Güei tan encarcelando xente ya intentando illegalizar partíos en Catalunya, pero mañana, nun dudeís que lo fadrán contra cualesquier persona o coleutivu d’otru territoriu, como de fechu ya ta ocurriendo cola Llei Mordaza, pero que se dirá a más si nun aparamos esti atropellu antidemocráticu. “
Poro, llamen al Pueblu Asturianu a participar na concentración xunitaria escontra la represión, esta tardi na Plaza la Escandalera.
Redaición InfoAsturies
This work is licensed under a Creative Commons Attribution 4.0 International License.
