Más de mil miembros de les fuercies armaes del estáu español tan destinaos a “defender l’orde y la llei” n’Asturies

Nos caberos seies años puede costatase un xorrecimientu progresivu de los efeutivos del Exércitu español destinaos al nuesu territoriu, sumando un  2,6% más respeuto al númberu de militares moraores n’Asturies nel añu 2011. Esta tendencia contrasta col amenorgamientu de tropes en puntos del estáu español, como  Castiella, onde la presión militar baxó un 16,8 por cientu, Madrid, el País Vascu o les Baliares. Medró sicasí la presencia en puntos como Galicia, Catalunya, Cantabria o Asturies, sin que se diere información de los motivos que respuenden a estos movimientos de tropes (seique en dalgunos casos estos seyan evidentes)

N’Asturies tan destinaos agora mesmo un total de 1.087 efeutivos, ensin que se sepa la distribución entre oficiales, suboficiales y tropa.
Ante estes y otres cuestiones, l’Executivu español respuende que “Conforme a la normativa vixente la distribución y despliegue del personal d’unidaes de les Fuercies Armaes constitúi material clasificao, ya que puede afeutar a la seguridá de les mesmes”.

Redaición InfoAsturies

This work is licensed under a Creative Commons Attribution 4.0 International License.