La desapaición de les grandes empreses de les cuenques mineres y con elles de los miles de puestos de trabayu asociaos menacia’l futuru d’una de les más emblemátiques fasteres asturianes

Esplosivos Río Tinto, Duro Felguera, Ensidesa, Hunosa, Alas Aluminium, Venturo, Ascamón… y agora Iberdrola, les empreses que dieron a les cuenques asturianes el so puxu industrial van desapaeciendo, arrastrando con elles a otres más pequeñes, amás d’a la hostelería ya’l comerciu de la fastera. Nun pasará muncho tiempu ensin qu’esto derive nuna perda entá mayor de población ya’l consiguíente retayu en servicios (colexos, centros de salú…) que ya nun sedrán asumibles pa una economía fundía.

El preslle de la central de Lada ye un golpe más, nun plazu másimu de cinco años sedrá otru recuerdu industrial, esbardiando los 115 millones invertíos l’añu pasáu  pa reducir les sos emisiones ya otros 17 que s’invertirán nel so desmontaxe, un total de 132 millones d’euros que dexarán a La Felguera con cerca de cien opciones menos de trabayu.

Ante esta situación, l’inmovilismu y la indiferencia del “Principado”, de les cientrales sindicales y de la mesma población, qu’asiste ensin gorgutar al desmantelamientu de tol so texíu económicu, dando la espalda a una llarga hestoria de reivindicación social y llaboral: la xente de la revolución del 34, de la güelgona del 62, de les grandes movilizaciones mineres y metalúrxiques del sieglu pasáu, camudó’l futuru por un presente cómodu y desentendíu, que de xuro pasará factura a los sos descendientes. Ya ta pasándola.

Llucía F. Marqués

This work is licensed under a Creative Commons Attribution 4.0 International License.