L’aprebación de les ordenances propuestes d’oficialidá nel conceyu de Xixón, con 273.422 habitantes, reconoceríen darréu los drechos llingüísticos de más del 26% de la población asturiana
Ante la reciente declaración del Plenu de Xixón, aprebada polos grupos de Xixón Sí Puede, IX, PSOE y Foro respaldando la oficialidá del asturianu y qu’afala al “Principado” a aniciar la reforma l’Estatutu d’Autonomía col envís d’incluyila nelli, Andecha Astur afala a los grupos municipales a presentar darréu unes ordenances d’oficialidá nel conceyu “que dean conteníu rial a esa voluntá de normalización democrática que supón la oficialidá de la llingua d’Asturies”.
“Nun val namás con facer declaraciones oficiales favorables a la Oficialidá, hai que concretales llegalmente ellí onde se tien capacidá pa ello” declaró Lola S. Vallina, qu’aporfió en qu’agora mesmo reconocer los drechos llingüísticos del pueblu asturianu a nivel de Conceyu ta en manes de los partíos que se dicen favoratibles a la oficialidá, ya qu’estos gobiernen nun territoriu nel que moren más del 70% de los asturianos.
Lola tien nidio que “La reconocencia de los drechos llingüísticos de los vecinos de Xixón a nivel de Conceyu nun sustitúi la necesaria oficialidá de la llingua a nivel nacional, pero supondríe un perimportante avance, con efeutos práuticos inmediatos, munchu más eficaz que declaraciones ensin plazos nin compromisos que fasta agora va quedando en puru posturéu ensin repercusión práutica”.
Redaición InfoAsturies
This work is licensed under a Creative Commons Attribution 4.0 International License.
