Mañana preslla’l plazu pa escribise nel XVIII Seminariu d’Estudios Asturianos de la Fundación Belenos que se cellebrará’l fin de selmana del 18/19 con siete espertos n’etnografía  que falarán de los medios tradicionales d’enfrentase al mal

La Fundación Belenos entama añalmente una xuntanza pa dar a conocer aspeutos mui concretos de la cultura’l país. Esti añu’l seminariu lleva por entítulu “Escontra’l mal: remedios na sociedá tradicional asturiana”  y nelli trataránse los mieos más típicos, les representaciones del mal y los medios colos que los asturianos mos enfrentamos a ellos tradicionalmente.

Los siete espertos aconceyaos pa la ocasión destaquen pol so rigor ya’l so compromisu cola tradición oral y la cultura inmaterial asturiana, lo que fai d’esta una ocasión perbona p’averase a les creyencies  que remanaron la vida de la nuesa xente nun hai tantu tiempu. Trataránse estremaes cuestiones alrodiu del conocimientu del mal y  de la manera que teníen los nuesos antepasaos d’enfrentase al elli, pa protexese a ellos mesmos ya’l so ganao.

La xornada del sábadu ta bien aprofitada, con intervenciones de magar les diez de la mañana, entamando por José Antonio Mesa Pieiga, Alcalde d’Allande, qu’abrirá les xornaes, pa dar pasu darréu a l’etnógrafu Cristobo de Milio Carrín, que va falar del conceptu del mal na sociedá tradicional asturiana. A les once y media, l’escritor y naturalista Ignacio Abella dará una charra entitulada «La ñatura escontra’l mal: remedios botánicos y otres práutiques tradicionales».A les doce y media podremos sentir falar de  «curandeiros, compostores y otros sanadores», de la man del etnógrafu y fisioterapeuta Martín de Villar.

Na  tardi sedrá’l turnu de Xosé Antón Fernández ‘Ambás’ y Ramsés Ilesies, etnógrafos y músicos, que nos apurrirán fórmules máxiques ya esconxuros en «El poder de la pallabra: rezos, ensalmos y esconxuros», dando-y llueu’l pasu  a Berto Álvarez Peña, etnógrafu y dibuxante, que falará de «la enfermedá d’aniciu máxicu».

La primer xornada completaráse con un filandón con música’l País nel Café Centro.,

El domingu entama de nuevu a les once y media, cola proyeición del documental “A Bruxa de Brañavara”, coincidiendo col centenariu del nacimientu d’Amparo López, la bruxa bualesa, abriéndose llueu un alderique al públicu. Fredo de Carbexe, autor del llibru Parzamique en Brañavara, fadrá la introducción a esti documental.

Llucía F. Marqués

This work is licensed under a Creative Commons Attribution 4.0 International License.