L’investigaor Marcos Rodriguez dio na so ponencia un repasu a los caberos 33 años de la llingua nes escueles

Nesti intre, nel que la oficialidá abulta cercana, cola recién puesta en marcha de la primer esperiencia d’usu de la llingua asturiana como vehicular en dalgunes asignatures ya’l alderique na cai ya’n tolos medios de comunicación, ye importante un repasu hestóricu al movimientu de defensa de la llingua asturiana, un movimientu que garra puxu nos postreros años del franquismu col ñacimientu de Conceyu Bable y l’apaición d’una pintada perdayuri: Bable nes escueles.

La ponencia presentada ayer tardi nes XXVI Xornaes Internacionales d’Estudiu de l’Academia de la Llingua Asturiana  retoma esi llema nel so entítulu, “Bable nes escueles: Averamientu hestórico-políticu a la vindicación de la escolarización de la llingua asturiana” pa facer, de la man del investigaor Marcos Rodríguez, un interesante repasu hestóricu a los primeros años de normalización social del asturianu, dende 1974 al 1984, cuando irrumpe l’asignatura de Llingua Asturiana na escuela de manera oficial y reglada.

Marcos Rodriguez presentó esos fechos cola perspeutiva de los 33 años de llucha llingüística que nos separten d’ellos, analizando tamién la situación actual y les necesidaes del idioma anguañu, lo mesmo na escuela que nel restu de la sociedá.

Redaición InfoAsturies

This work is licensed under a Creative Commons Attribution 4.0 International License.