El Sindicatu d’enseñantes SUATEA llanzó una campaña de recoyida de robles pa desixir un Pautu pola estabilidá

El descomanáu amenorgamientu de la tasa d’interinidá (fasta namás el 8%) que se va consiguir coles oposiciones masives de los prósimos años, nun soluciona’l problema d’inestabilidá que van  siguir careciendo los que nun saquen la plaza, alvierten dende’l Sindicatu d’enseñantes asturianu.

Nel so comunicáu faen ver que’l profesoráu interín que nun supere estes pruebes o nun seya escoyíu va atopase nuna situación vraeramente difícil, ensin escaecer que los mayestros qu’anguañu cunten con una plaza interina van tener grandes dificultaes pa preparar los esames “A los docentes interinos oblígase-yos agora a escoyer ente estudiar oposiciones nes academies o preparar les xeres docentes diaries, como son la preparación de les clases, correiciones, entamar actividaes extraescolares, la formación continua, idiomes… El cabás del profesoráu interín yá pesa demasiáu.” Amás, califiquen a les pruebes d’oposición como obsoletes y poco apropiaes “Yá demostremos – cola nuesa práutica docente atropada- el nuesu méritu y capacidá pa la docencia.”

Poro, nun s’amuesen contentos col alcuerdu pa la meyora del empléu públicu, robláu apocayá pol ministru Montoro y los sindicatos CCOO, UXT y CSIF y piden a la Conseyería d’Educación un pautu d’estabilidá pa esti colectivu que nun traiga consigo la perda de puestos de trabayu dempués de la celebración d’estes pruebes.

Reclamen amás el cambéu de la llexislación educativa vixente pa permitir la realización de procesos d’afitamientu pal profesoráu interín, tal que se recueye nel Estatutu Básicu del Emplegáu Públicu, por que los docentes interinos puedan consolidar los sos puestos de trabayu y los aspirantes a una plaza n’educación tamién puedan aportar.

Redaición InfoAsturies

This work is licensed under a Creative Commons Attribution 4.0 International License.