Voi proponer un esperimentu. Maxinen un aula de la escuela más cercana a la so casa. Si  tien vusté fios, piense na so clas. Probablemente-y vengan a la tiesta 25 rapacinos y rapacines sorrientes n’estremáu grau de despelurcie

Faiga tres grupos, al debalu. Tendrá ocho o nueve neños en caún. Mirelos bien. Ún de los tres grupos pasa fame.

Fame, frío, falta de ropa y calzao afayaizo, escasez de material escolar, dificultaes d’hixene … puede mesmo que dalgún viva nuna infravivienda, compartiendo casa colos güelos y más familia o ensin lluz. Probablemente nun prendan la calefacción en tol añu y tengan tasao l’agua caliente. Namás en Xixón conócense 7 families que viven en vehículos; n’Avilés hai otros 3 casos recoyíos, n’Uviéu son 5 families les que se saben, del restu d’Asturies nun hai datos. Nos colexos de los sos fíos nun lo saben.

Vuelva a mirar los grupos. Paez imposible ¿verdá? Veseyos a toos asemeyaos… La probitú non siempres rescampla y en munchos casos les families faen tolo posible por disimular la so situación, cualesquier cosa anantes de ver al fíu señaláu, que nun falte esi llibru que piden en clase, que nun seya l’únicu que nun va a la escursión.

Falando d’escursiones, una reflesión dedicada a los mayestros. Una escursión escolar de cinco euros dexa una familia ensin llechi una selmana; un llibru de llectura obligatoria merma a la metá’l presupuestu familiar semanal pa comer. Piénsenlo bien anantes de pidir más gastu escolar.

Tornando al tema principal. Tenemos un terciu, cuando non más, del  futuru d’Asturies sobreviviendo na miseria. Nun se fai res al respeutu. Nos ayuntamientos sobren les perres p’asuntos sociales. Los sofitos a la probitú infantil, 700 euros pa pasar l’añu, algamen malapenes a un terciu de los sos solicitantes. ¿A quién interesa finar col futuru’l país? Da que pensar…

This work is licensed under a Creative Commons Attribution 4.0 International License.