El Grupu d’Investigación en Conductes Adictives de la Universidá d’Uviéu triplica’l númberu de participantes nel programa al tiempu que consolida los resultaos del so métodu, llogrando que más del 70% de los participantes dexe de fumar por aciu de protocolos d’ocho sesiones y ensin recurrir a nengún fármacu

El proyeutu de “Tratamientu del tabaquismu en fumadores con depresión” desendólcase na Unidá de Conductes Adictives de la Facultá de Psicoloxía, n’Uviéu y nel centru de salú de Puerta la Villa de Xixón y supón el primer intentu a nivel estatal de desendolcar y evaluar un protocolu pal tratamientu integráu de dambos problemes –tabaquismu y depresión- de manera conxunta, en llugar del tradicional sistema secuencial.

L’estudiu puestu en marcha pol Grupu d’Investigación en Conductes Adictives de la Universidá d’Uviéu dexa concluyir que’l tratamientu tien d’ufiertase de forma integrada, tratando dambos problemes coles mesmes y consiguiendo que la depresión remita o amenorgue la so sintomatoloxía de forma significativa, al empar que se trabaya con un métodu d’amenorgamientu gradual del consumu de tabacu individualizáu pa cada paciente.

Fasta’l intre fueron 146 los pacientes qu’allegaron al Grupu solicitando tratamientu pa dexar de fumar. La edá media d’estes persones ye d’unos 53 años, fumadores de daqué más d’un caxetu de tabacu diariu, con una clara mayoría de muyeres  (74%), con diagnósticu de depresión o sintomatoloxía depresiva grave y d’ansiedá. Sicasí, esti perfil de gravedá nun significa que les persones con una sintomatoloxía depresiva sele nun puedan participar, lo que pueden faer poniéndose en contautu cola Unidá de Conductes Adictives al traviés de los correos Electrónicos grupocauniovi.es o secadesuniovi.es, o llamando directamente al teléfonu de la unidá, 985 10 41 89.

Llucía F. Marqués

This work is licensed under a Creative Commons Attribution 4.0 International License.