La normativa nun tien en cuenta les peculiaridaes del suelu asturianu y esixe una inversión inasumible pa la situación de la ganadería nel país

El sindicatu de llabradores COAG dio l’alarma énte les esixencies de la nueva normativa relativa a purinos. L’aplicación de la mesma como ta redautada nesti momentu implicaría’l preslle d’abondes esplotaciones n’Asturies.

El nuevu real decretu impulsáu pol Gobiernu español, qu’introduz novedaes pa l’aplicación de la Política Agrícula Común, implicaría una riestra d’esixencies que, según el sindicatu, “son imposibles téunicamente ya inasumibles económicamente”, polo que pide la suspensión inmediata de les nueves obligaciones n’Asturies.

La normativa foi redautada a nivel español y nun tien en cuenta les carauterístiques de la mayor parte del tarrén asturianu, que torguen l’aplicación de la llei de purinos na forma que determina’l decretu, por cuenta de la durez del tarrén y la presencia de piedra nel sosuelu. Amás, según COAG, el sistema ganaeru asturianu nun xenera apenes contaminación por nitratos nin cola xestión de purinos, una y bones  les balses de purinos de les esplotaciones tán tapaes, polo qu’el so conteníu ta lleldáu y poro, según estudios esistentes, amenorgase nun 80% la presencia de contaminantes y de los gases d’efectu invernaderu.

El costu de les obres, per otra parte, sería bien malo d’asumir pola mayoría de les esplotaciones ganaderes, la mayoría de les que s’atopen yá nuna situación económicamente bien xusta.

Redaición InfoAsturies

This work is licensed under a Creative Commons Attribution 4.0 International License.