L’ayuda foi refugada a la gran mayoría de les families xixoneses que, cumpliendo los requisitos, la solicitaron
Alredor de 1. 400 families de les más de 1.800 que solicitaron l’Ayuda escontra la Probitú Infantil en Xixón vienen de recibir la carta que yos la deniega. El motivu, pa la gran mayoría de los casos, nun ye’l nun cumplir los requisitos necesarios p’aportar a la mesma, sinón que’l Conceyu alega “falta de presupuestos”.
Pablo Fernández, voceru de la Plataforma d’afeutaos pola teórica falta de presupuestos pa l’ayuda escontra la probitú infantil, denuncia que “Na mesma selmana que se tán recibiendo cartes cola ayuda refugada, aludiendo a una teórica falta de presupuestu, pudimos lleer, al traviés de los medios de comunicación, como se dexaron ensin gastar 59 millones d’euros, de los anteriores presupuestos y 4,1 d’ellos, pertenecen a la partida de bienestar social.”
La primer actuación foi escribir una carta a la conceyala de Bientar Social, Eva Illán, solicitando aconceyase con ella, o daquién de la so conceyalía, pa tratar de la tema. Si nun se propón nenguna solución vidable, camienten entamar una concentración metanes la selmana d’Antroxu, coincidiendo cola cellebración de la Xunta Gobiernu.
Yá hubo reacción per parte d’otros grupos sofitando esti colectivu, como l’asociación “La Emerxencia nun puede esperar” y l’organización d’esquierdes Andecha Ástur.
Sonia D. González, responsable de la estaya de Muyer y Reciella d’A.A, declaró que ”Desiximos que se tomen midíes darréu, non solo pa esclariar esta tema, sinón p’acabar cola alarmante tasa de probitú infantil que carecemos n’Asturies. De nenguna manera puede consentise qu’aquellos que representen el futuru del país vivan la primer etapa de les sos vides en condiciones bien inferiores a les necesaries pal so correchu desendolque, col evidente perxuiciu qu’eso trai, ante la pasividá de les alministraciones responsables”.
L’ayuda escontra la probitú infantil consiste nun pagu únicu de 700 € pa families con menores a cargu con una renta familiar escaso, valorándose na puntuación pa la so concesión ser familia numberosa y/o monoparental y ser víctima de violencia de xéneru.
Pa más información so la situación de la reciella n’Asturies, lleer “Criando Miseria”
This work is licensed under a Creative Commons Attribution 4.0 International License.
