Cuerre peles redes un Mapa sobre les Denominaciones d’Orixe Protexíes (DOPs) de Vinos d’España. Ye’l mapa oficial qu’apurre’l Ministeriu d’Agricultura y Pesca, Alimentación y Mediu Ambiente del Gobiernu del Reinu d’España.

N’él atopes les más conocíes como La Rioja, Ribera del Duero o Rías Baixas, pero tamién DOPs pequeñes como DOP Pla I Llevant en Palma de Mallorca o DOP Bullas en Murcia. Son 69 Denominaciones d’Oríxe, ente les que nun ta DOP Cangas. Cangas apaez como “Vinu de Calidá”.

La cabera versión qu’atopes na web oficial del ministeriu ye de 2014, mientres que la DOP Cangas formalizose nel BOE del 4 de Mayu del 2009. Tuvieron 5 años pa iguar el mapa, ya otros 4 p’actualizalo. 9 años d’error.

¿Casualidá?

Fai unos meses salió la noticia qu’Europa torgaba’l crecimientu de los viñales asturianos, con un repartu mui perbaxo de lo pedíu. La prensa xeneralista asturiana, col so servilismu habitual, criticaba a Europa pol ramplón repartu, pero ye qu’Europa nun ye la que reparte. Reparte’l Ministeriu d’Agricultura y Pesca, Alimentación y Mediu Ambiente del Gobiernu del Reinu d’España. ¿Adivináis pa onde foron los mayores repartos? DOP La Rioja, DOP Ribera de Duero y DOP Rueda. Xusto les DOPs más desconocíes y que más sofitu necesiten de toes.

Mientres, los nuesos héroes de Cangas, escaecíos pol so Ministeriu, pola so Xunta Xeneral y pela mayoría d’asturianos y españoles, siguen testerones bregando pela so reconocencia. Esti mes, Bodega Vidas algamó’l mercáu xaponés (y dende 2013 ta nos EEXX); Vitheras Blancu apaez ente los 5 meyores vinos recomendaos pa sorprender nes fiestes navidiegues d’El País;

Monasterio de Corias siguen apecuñando premios pol so Escolinas Monovarietal Carrasquín, y CienMontañas Carrasquín quedó sextu nos prestixosos Decanter Awards pente 92 vinos atlánticos.

Si la nobleza d’un pueblu ha midise pela manera de llevantase, entós Cangas ye un pueblu abondo noble. Deprendamos.