El Conceyu de Xixón menacia con valtar la marmolería Santa Olaya y la vivienda d’al lláu incluso anantes de que’l xulgáu emita sentencia sobro’l recurso a la  so espropiación

La mayoría de los edificios del final de la cai Pachin de Melas, veriquina de la playa l’Arbeyal, ya foron valtaos pa  costrución d’una nueva urbanización y l’ampliación del Clú Esportivu Santa Olaya. Sicasí, queden en pie dos costruciones: la Marmolería Santa Olaya, entá n’activu, y una vivienda habitao.

Los propietarios d’estos inmuebles vienen de recibir orde de desaloxu de los mesmos, informándoseyos de que’l conceyu executará la expropiación el xueves once de xineru a les nueve la mañana, pesi a que’l recursu presentau polos mesmos ante’l Tribunal Superior de Xusticia d’Asturies entá nun fore retrucáu.

El propietariu de la vivienda aporfia en que lo que-y darán pola so casa nun algamará “nin siquiera pa mercar una vivienda na urbanización que se costruyirá” entantu que pa los trabayaores de la marmolería el so esbarrumbe implica, direutamente, la perda de los sos puestos de trabayu.

Esti ye’l proyeutu de costrución pa los terrenos espropiaos y les naves industriales valtaes.

Llucía F. Marqués

This work is licensed under a Creative Commons Attribution 4.0 International License.