Los datos del SADEI sobro movimientos migratorios n’Asturies nel añu 2.015 falen d’un costante desangrase del nuesu pueblu.

La falta de trabayu, les llacerioses condiciones llaborales y les torgues económiques son los motivos qu’emburrien a aquellos que se ven forciaos a emigrar a la gueta d’horizontes más prometeores, pero nel tresfondu d’esta sangría subyaz la falta d’enfotu nel futuru d’Asturies.

D’estos emigrantes, 10.099 decidieron colar a España, demientres qu’otros 4.825 escoyeron otros países como destín. Calcúlase que a lo menos l’ochenta por cientu d’entre ellos nun tornarán.

Les consecuencies pa Asturies son abondes; per un lláu, costátase que la gran mayoría de los nueos emigrantes son mocedá, xeneralmente con una bona formación  -pente 25 y 55 años- o families con rapacinos -1.598 neños y neñes medrarán fuera d’Asturies, faciendo perabegoso el retornu- lo que lleva a un progresivu envieyecimientu de la población asturiana; per otru, el deseraigonamientu que supón l’allonxamientu del llar d’estos 15.000 asturianos pon en pelligru el texíu cultural, un ámbetu ya mui perxudicáu. Por supuestu, nun se pueden dexar de lláu les consecuencies presonales qu’esta emigración implica, tanto pa los que colen como pa los sos familiares, que ven partir a los sos seres querios.

D’otra man, nel mesmu añu aportaron a Asturies 13.000 presones provenientes d’otros países, datu que nun ye negativu en si mesmu pero que conlleva una riestra de consecuencies que nun tienen que s’escaecer. La ausencia de proteición llegal a nivel llaboral que carecen los inmigrantes permite la esistencia de trabayos de mui baxu nivel, con salarios que rocen en munchos casos la explotación, lo que non solo perxudica a estes presones sinon que ta faciendo cayer alarmantemente les condiciones llaborales en tol país.  Arriendes d’ello, la falta d’una correcha política d’integración cultural caltien nos más de los casos a estos nueos habitantes allonxaos de la cultura y llingua asturianos, lo que, sumao a la fuga d’asturfalantes, daña considerablemente el panorama llingüísticu. Delles asociaciones ya tan trabayando nesi sen, ufiertando clases y conceyos de conversación llibre a quien quiera deprender a falar asturiano, pero la convocatoria nun siempres aporta a los sos principales destinatarios.

This work is licensed under a Creative Commons Attribution 4.0 International License.