La práutica totalidá del periodu d’allegamientos a les previsiones de plantiya pal cursu 2918-2019 nos centros educativos públicos de Primaria y Secundaria trescurrió mientres el periodu vacacional

A finales del pasáu trimestre, cuasi coincidiendo col entamu de les vacaciones navidiegues, la Conseyería d’Educación unvió a los centros educativos públicos la so previsión de plantiyes pal cursu 2.018/2.019. Los datos completos nun fueron públicos fasta ayeri, polo que los sindicatos nun pudieron realizar un analís pormenorizáu de los mesmos. Sicasí, dende’l sindicatu d’enseñantes asturianos, SUATEA, yá fixeron un primer analís.

De man, desaniciense puestos en Primaria ya Infantil, de la que se creen otros en Secundaria, principalmente en grandes núcleos urbanos y rellacionaos, en munchos casos, con especialidaes de ciclos formativos.

En dellos centros suprimiéronse places rellacionaes colos sofitos a l’atención a la diversidá, qu’ayuden  al alumnáu con necesidaes específiques. Pal sindicatu, esta midía “topeta direutamente  coles mires d’amenorgar los niveles de fracasu y abandonu escolar”. Amóntense per contra les places rellacionaes colos programes billingües d’inglés.

No que cinca a les condiciones llaborales de los docentes, la Conseyería nun tien previsto dalu plan pa revertir les hores lleutives impuestes al profesoráu cola sida de la crisis económica. Esta medría non remunerao d’obligaciones y hores lleutives  “enzanca’l trabayu’l personal docente llastrando les posibilidaes d’ufiertar la enseñanza calidable que correspondería a un país avanzao y desenvuelto”.

Toos estos datos unviáronse a los centros en víspores de vacaciones, de la  que se abría un períodu d’allegamientos a eses previsiones que remataba ayeri, martes, 9 de xineru, daqué qu’enzancó seriamente la reación de los centros énte los desalcuerdos colos mesmos.

This work is licensed under a Creative Commons Attribution 4.0 International License.