David Castañón – www.lesfartures.com – @lesfartures
Paez que foi ayeri cuando Pablo, sentáu precisamente nuna mesa del Cabanón, díxome que diba facese col chigre.
Daquella parábamos ellí, amás de porque ye preciosu, porque yera de Javi de Dixebra. Un sitiu afayadizu onde tomar algo de tardi y unes copes de nueche.
Pero Pablo garró eso y ameyorolo muncho más. Personalizó’l chigre, adautose a los tiempos y camudolo nuna de les referencies cerveceres del norte de la península. Amás, como ye él, seliquín, ensin llamar l’atención (sacante la so altura, que ye complicáu que pase desapercibíu). Trabayando día a día, ensin sacar muncho la tiesta, dexando namás que bones palabres pol camín y faciendo d’El Cabanón una segunda casa pa muncha xente.
Agora mesmu, n’Avilés, pues beber la meyor cerveza del mundiu, más fresca y con más variedá que na mayor parte d’Europa. Y too gracies a un ex-melenudu de Valliniello, que paez selín pero nun ye a parar quietu.
El Cabanon ta de cumpleaños, namás y na menos que 15 años. 15 años de bones y males dómines, de vaques más flaques y vaques más gordes, pero ensin perder un vierbu d’ilusión. Y como los cumpleaños son pa celebralos, tenéis tola selmana enllena d’eventos, prebes de cerveces, de whiskeys, alcuentros con cerveceros y una gran folixa pa rematar el sábadu al mediudía.
Vaya dende equí la norabona y l’agradecimientu tamién a too’l equipu del Cabanón, los que tan y los que tuvieron. Nica, Claudia y Luis, gracies fonderes por aguantanos tanto.
¡¡Salú y a por 15 más!!
This work is licensed under a Creative Commons Attribution 4.0 International License.
