“Bobalización porque’l mundu global del que nos falen tolos díes trata a los seres humanos como “bobos”; ello ye, toos y toes tenemos que sentir, pensar, producir, consumir y gociar de la mesma forma. Salise de dicha norma ye convertise nun marxinal o nun subversivu.”

Esta fin de selmana presentóse en La Felguera la pieza teatral Bobalización 2, al cargu de Comunata Comediantes, una xenial  actualización económicu-social al ritmu de los Pasos de Lope de Rueda nun guión de Lara Herrero (tamién cantante de la Txusma) y Carlos Alba (actor que dio vida ente otros al entrañable Cellero) y que cuntó amás cola actuación tamién rellumante de Chus Prieto “el flacu”.

En cuenta de sieglu d’oru de los tiempos de Lope, treslládennos al sieglu del euru, y la comedia estiéndese pola corrupción  y los trapos puercos del reinu actual, los asuntos sanitarios y l’apropiación indebida de les privaes, les estafes  de les preferentes de los bancos, el control de granes por empreses como Monsanto, el fuximientu de millones a les Indies de Panamá”, l’usu economicista de los uniformes (militares o católicos), y les families borbóniques y los sos asuntos puercos, tollo con distintos ritmos, con duelu d’espaes, con música, copla y títeres, en formatu de comedia popular.

“Nun alloñáu reinu d’un país cercanu les xentes sobreviven ente corrupción y lladroniciu, afaraes pol Reximientu’l 78. Sicasí lo que más-yos esmolez ye la llegada d’una nueva horda de bárbaros: los Populistes.”

El bobu y el pícaru reprodúcense’n cada Pasu en distintos personaxes pa provocar un analís urxente de la realidá, nuna semeya “de costume” que val más que delles tesis doctorales o que munchos mítines sesudos: inclusive na desesperanzada crónica de la insurrección del 15-M, y de la gloriosa clase obrera” que la comedia asitia como derrotada por altes dosis d’individualismu y “nueves tecnoloxíes” alministraes polos mandamases de siempre, coles recetes de la precariedá llaboral y l’entrega de Soberanía al Euru de la Merkel y al camanduleru de les Indies de Norteamérica”.

Lara, Carlos y Chus, n’escelente comedia y fonda reflexón en risa, treslládennos  y provoquen en redol a la globalización que nos atocheció, y de la que ¿seique llogremos salir d’ella, insumisa y subversiva-mente?

Redaición InfoAsturies

This work is licensed under a Creative Commons Attribution 4.0 International License.