Un artículu de La Nueva España compara a la mocedá asturiana con vaques camín del mataeru
Dientro l’artículu, espublizáu’l 18 de xineru, M.J.I. equipara la venta de xates a Mediu Oriente pal so sacrificiu cola emigración forciada de la mocedá con formación universitaria fuera del país, dando a entender, de pasu, que nos dos casos esti abandonu d’Asturies nun solo ye positivu, sinón que ye “el so destín”. Entendemos qu’entrambos, vaques y mocedá, son demasiao bonos pa quedar n’Asturies.
Les sos pallabres testuales son:
“A les vaques de la rexón pasa-yos como a munchos xóvenes universitarios, emigren pa cumplir un destín”.
Coles sos pallabres, ensertaes ente les declaraciones de Jesús Casas, veníu de Doñana pa ser el Direutor Xeneral de Desendolcu Rural y Agroalimentación d’un país cuya rialidá malpenes conoz y que de manera intencionada obvia’l detalle de que les vaques, criaes n’Asturies, véndense pol so pesu equí pa ser lluéu engordaes en cebaeros en Catalunya y lluéu revendies dexando fuera la mayor ganancia, M.J.I describió con precisión la categoría que pa l’alministración asturiana tienen los nuesos universitarios: carne camín del mataeru.
Llucía F. Marqués
This work is licensed under a Creative Commons Attribution 4.0 International License.
