La Seguridá Social camudó, ensin desplicaciones previes y con calter retroactivu, los contratos predoctorales roblaos dende 2014, pasando de contratos por obra y serviciu, a contratos en práutiques, afeutando a alrodiu 200 investigaores asturianos
Anque fontes gubernamentales aseguren qu’estos cambeos namás tienen calter alministrativu, ensin afeutar a la cotización, subsidiu, indemnización per despidu, etc., sindicatos, abogaos y otres fontes consultaes aseguren tolo contrario: el cambéu tien fondes implicaciones pal futuru llaboral de los afeutaos.
Ciencia Con Futuru (CCF) y Federación de Mozos Investigadores / Precarios (FJI) reclamen “Una respuesta conxunto y contundente qu’asegure un futuru pa la ciencia nesti país” y recuerden que “Tou cambéu nes condiciones de contratación efectuáu de manera unillateral y ensin la conocencia y aceptación de dambes partes ye illegal” polo qu’esixen la so inmediata rectificación y la comparecencia del Sr. Ministru d’Economía, Industria y Competitividá na Sede Parlamentaria pa dar les desplicaciones pertinentes.
Tamién animen a tolos grupos políticos, organizaciones sindicales, movimientos sociales, al sector científicu y a la sociedá en xeneral a sofitar esta llucha.
Esti cambéu afonda entá más nel problema de fuga de celebros y precarización del trabayu científicu que yá cerecemos n’Asturies, pesi a la importante aportación de los nuesos científicos a diverses meyores: la plataforma Web of Science destaca’l llabor de 48 científicos asturianos, con importantes aportaciones en distintes areas: Ciencies de la Salú, Bioloxía, Ciencies de la Tierra, Tecnoloxía Agrícola, Matemátiques, Química ya Inxeniería, lo que nun torgó que nos últimos años produxérense daños bien considerables nel nuesu sistema d’investigación. El recorte de presupuestos y un procesu alministrativu totalmente ineficiente tán xenerando una perda de competitividá y la fuxida de mozos científicos en busca d’escenarios más favoratibles.
This work is licensed under a Creative Commons Attribution 4.0 International License.
