Dende Muyeres en llucha CSI convoquen concentraciones y movilizaciones pa visibilizar el problema de la violencia machista y pa sofitar a les tres persones multaes por poner una pancarta nesi sen

Dempués de la manifestación del xueves 18 peles cais de Xixón, una concentración ayeri delantre la Gota Llechi (Xixón), otra delantre la Casa Conceyu  de Ribeseya y una tercera nel llicéu de Mieres reclamaron el fin del patriarcáu y  amosaron la so refuga, “non sólo polos asesinatos, que son la punta del iceberg, sinon por toles violencies machistes”.

Per otru lláu, tan convocaes otres dos concentraciones en sofitu a les tres persones encausaes por colocar una pancarta de denuncia de la violencia machista, el 1 de xineru del 2015 nel solar de l’antigua estación de tren (agora’l Solarón), polo que foron multaes con 200 euros ca ún. Nel mesmu llugar foron colocaes pancartes por otres cuestiones, como a favor del tren y de propaganda elleutoral, ensin que foren sancionaes. Les multes recurriéronse y esti mes, dos años dempués, cellébrase’l xuiciu nel que les persones afeutaes pidin la nulidá de les multes y la devolución de les cantidaes cobraes pola Casa Conceyu. Les concentraciones tendrán llugar a la hora los xuicios, dos d’ellos el díe 23 de xineru a les 10:30 h, y l’otru’l 14 de febreru a les 11:30 h, nos xulgaos de Xixón.

Dende Muyeres en llucha, amás, enviaron una carta abierta a l’Alcaldesa de Xixón, reclamando la so intervención a favor de los multaos, siendo consecuente col puntu del “Pautu social contra la violencia sobre les muyeres” de Xixón qu’especifica la necesidá de “sensibilizar a la población en xeneral sobre’l problema de la violencia de xénero”, pidiéndose nel mesmu pautu que “la sociedá nel so  conxuntu tien de manifestar la so refuga  evidente”, daqué que los multaos trataben de facer cola pancarta.

Llucía F. Marqués

This work is licensed under a Creative Commons Attribution 4.0 International License.