El Parque Nacional de Picos d’Europa confirma que’l Seprona nun identificó a los responsables, peise esistir un videu que los graba n’aición

Naide va pagar pol asañamientu con un xabalín mancáu que foi espeñáu na ruta’l Cares el pasáu mes de Payares por siete escursionistes, que lu acorrexaron y espeñaron, provocándo-y la muerte.

Los fechos produxéronse nun Parque nacional, fueron vistos por dellos testigos y grabaos por persones qu’espublizaron les imaxes como preba l’abusu, polo que paez poco creyíble la imposibilidá d’identificar a los culpables. Nel videu puede vese que l’animal taba primeramente mancáu y nun podía movese cuando foi acorrexáu y emburriáu al vaciu.

Amás de contravenir la llexislación específica de la Rede de Parques Naturales, na que’l simple fechu de coyer una flor puede ser costitutivu de delitu, hai que remembrar que la reforma’l Códigu Penal del 2015, inclúi’l delitu d’asañamientu colos animales.

Llucía F. Marqués

This work is licensed under a Creative Commons Attribution 4.0 International License.