Amás d’añedir un díe a la so programación y cuntar con La Escuela Asturiana de Surf como nuevos collaboradores, el festival sigue sumando nomes al so cartelu

Xixón Sound Festival añede nuevos nomes al so cartelu: Mercury Rev, Neños Mutantes (Conciertu Mahou Cinco Estrelles), L – R, The Limboos, Fee Reega, Kurt Baker Combu y Tupper, siete nuevos artistes que se sumen a los yá conocíos de Sleaford Mods, La M.O.D.A. (Conciertu Mahou Cinco Estrelles), María Aranal i Marcel Bagés, Pablo Und Destruktion y Bigott. Na espera de pósimos nomes, el festival añede un díe a la so programación, el xueves 12 d’abril, allargando asina la so duración, que va ser de 4 díes per primer vegada.
Los abonos yá tán a la vienta en www.gijonsoundfestival.com, a un preciu de 55€ más + gastos, pero espérase que nun curtiu plazu ten a la vienta tamién les entraes por conciertu.
Anguañu, amás de la ufierta cultural de música, teatru y poesía, Xixón Sound Festival entama otres actividaes paraleles coles que busquen faer de Xixón una marca acomuñada a la cultura, la movilidá y l’anovación.
Una amuesa d’ello ye la nueva collaboración que se xunta a Xixón Sound Festival: La Escuela Asturiana de Surf, que suma la so ufierta al eventu, ufiertando la ciudá como destín para los amantes de los esportes marinos. Otres de les esperiencies que pueden afayar los participantes nel XSF son: Parapente, Golf, Descensu en Canoa, Vuelu en globu Airestáticu, Vela… que pueden consultase en Xixón Escapaes (www.gijon.info).

Les nueves incorporaciones
Mercury Rev
Van Ufiertar n’actuación única nun intimu y especial formatu acústicu col que cellebren los 20 años del so fabulosu “Deserter´s Songs”.
El grupu formase a finales de los años 80´s en Buffalo, New York, y fué en 1998 cuando editarón el so aclamáu ” Deserter´s Songs” que los llevó lo más alto de les llistes, trés singles que xubieron al top 40 de les llistes ingleses (“Goddess on a Hiway”, “Delta Sun Bottleneck Stomp” y “Opus 40”), y foi el discu del añu 1998 para la revista NME.
Comparaos davezu con The Flaming Lips, tienen bastantes relaciones: pocu dempués de la formación del grupu, Donahue xunióse a los Flaming Lips como segundu guitarrista y apaeció en dos de los sos álbumes. Entá más, dende’l discu de 1990, In a Priest Driven Ambulance, Dave Fridmann coproduxo tolos discos n’estudiu de los Flaming Lips; sacante Transmissions from the Satellite Heart (1993).

Neños Mutantes
L’Espaciu Mahou Cinco Estrelles va acoyer l’actuación de Neños Mutantes nel festival.
“Diez”, ye’l décimu álbum de la banda de Granada. Un discu atayante, selvaxe y poéticu que narra un viaxe escontra la llibertá. Ye la gran consolidacióhn d’una banda que lleven más de venti años de trayeutoria.
La llarga xira de “Naúfragos” remató cola banda casi escosa, decidía a empecipiar un períodu de descansu pa preparar a poco fueu el so décimu álbum. Sicasí’l descansu nun se llega a peracabar, cuidao que Ernie Producciones dexa estelada a la banda, al públicu y a los medios con un regalu sorpresa pol so ventiavu aniversariu: el discu “MUTANCIONES”, nel que lo más granao de la música independiente  (Russian Rede, Lori Meyers, Fernando Alfaro, Dorian, Sidonie, L’Habitación Roja, Maga, Neuman, Rufus T Firefly, Second, Napoléon Solo, Trepat, Carlos Sadness, Nada Surf…) rexistró les sos llectures de los cantares del repertoriu de Neños Mutantes en forma de versiones, que remataron con un hestóricu conciertu en La Riviera cola participación de casi toos estos artistes al pie de los mesmos Mutantes n’abril de 2016.
Curiosamente, a la selmana de tal cellebración la banda conoció’l so peor momentu dende la so fundación, cuando una engarradiella tres un conciertu en Murcia cuasi lleva a la separación a la banda.
N’esi estáu de shock emocional la banda asume la grabación del so siguiente discu como un desafíu para probar los sos llazos internos y pa forciar la so música saliendo de la so zona de confort. Pa ello apuesten pola produción de César Verdú y Abraham Boba de Llión Benavente, qu’aceuten la invitación y zárrense cola banda a grabar en Albuñuelas (Granada) a finales de 2016 nel estudiu del productor británicu Youth.
Nun podía llamase d’otra manera: “DIEZ” editáu en 2017 sumóse a la llarga carrera de Neños Mutantes, faciéndolos xubir otru pasu artísticu y profesional, con unu apueste especial pola intensidá y la lleutricidá, cola incorporación pal direutu d’Alonso Díaz Carmona ( cabezaleru de Napoleón Solu).

Fee Reega
Fee Reega nació en Balingen nel sur d’Alemaña y pasó poles escenes musicales de Berlín y Madrid antes de camudase a Asturies, onde anguaño mora en Xixón.
Publicó discos n’alemán, inglés y castellán, ente ellos dos LPs d’estudiu, “La Raptora”(2014) y “Sonambulancia” (2017). Fee Reega cunta con distintos formatos – la so banda actual ta formada por Dani Donkeyboy, Javier Bejarano, Ibán Pérez y Dolfo Montes. A parte del so proyectu propiu qu’ella defini como «folk problemáticu», ye cantante y compositora de la banda postpunk «Captains» y del grupu alemán de folkrock sicodélicu «Dead Hands».
Colos sos cantares duce y escuru cantaes en castellán con acentu alemán yá se consolidó na escena musical d’España y ta costantemente trabayando en nuevos proyectos. Reega ye un mundu por afayar.
Los Tupper, grupos hai munchos, pero de la so especie queden pocos.
Cantaba Gardel, nel famosu tangu, aquello de ”venti años nun ye nada” . Ensin dulda, nun podemos tar más en desalcuerdu col maestru, pos a Los Tupper esi tiempu diolos abondo de sí. D’aquella primer formación de Tupperguarros (viaxen hasta finales de 1995) inda güei sobreviven la dupla compositiva y fuerza motriz del grupu, compuesta por Raúl Real y Manu Gastáu; arriendes de la primer parte del nome, pol cual siempres fueron reconocíos polos sos siguidores.
Nel añu 2015 van somorguiar nun emocionante proyeutu, que va vese rematáu cola posterior edición del ep Ruins, xunto al escelsu orfebre del pop norteamericanu Kevin Junior.Llacesiosamente, esta obra va ver la lluz a títulu póstumu, el mallográu artista finaría en Xineru de 2016. La buelga que dexa na banda ye imborrable.
El restu de 2016 van centrase na composición y grabación del so siguiente discu: ”Hotel Debris”(Sunthunder 2017). Con un güeyu puestu nos sos más almiraos artistes ingleses como Kevin Ayers o Ray Davies, y l’otru apuntando a los bayous de Luisiana, l’artefautu volvió cocese a poco fueu, vezu de la casa. Obviamente, ellos aseguren que tamos ante la so meyor obra. Tolos músicos dicen lo mesmo. Eso ye cierto. Anque habría que fiase, porque grupos hai munchos, pero de la so especie queden pocos.

The Limboos.
Lo estraordinario dacuando asocede ante nueses mesmes ñarres. Y en poques ocasiones puede unu vanagloriarse de cruciase con un grupu tan magníficu como Los Limboos. Son estraordinarios porque nun ye nada común atopase con una banda actual de R&B con tantu talentu musical y que, de la mesma, suene estremao a tolos demás.
Y son magníficos porque la so devoción y conocencia polos maestros del xéneru afiguren en caún de los sos cantares, toos escritos por ellos mesmos. Nellos queda impresu un raru don: xunir ritmu y elegancia asgaya.
Kurt Baker Combu. Diversión , bonos cantares , actitú y saber faer… ¡¡Sóbra-yos rock !!
Kurt Baker Combu ye un más de los munchos proyeutos del xenín de Portland ( Maine ) afincáu en Madrí . Esta vegada acompáñenlu 3 musicos lleoneses d’ampliu currículum : Juancho Lopez al baxu ( Paul Collins Beat , Peralta , The Crepitos , Bummer , Thunderbolts….) , Jorge Colldan a la guitarra y coros ( Holy Sheep , The Flax , The Bright….) y Sam Malakiam a la bateria y coros ( Alrighters , Platillos Volantes )
En Mayu del 2018 va ver la lluz el so tercer discu “Let´s go Wild!” , nel sellu americanu Wicked Cool Records del mesmu Little Steven ( Guitarrista de Bruce Springteen , un de los protagonistes de la mitica seríe Los Sopranu , activista del Rock dende la so emisora Garage Underground n’USA …. )

L-R.

La decostrución de la música tradicional asturiana. Dúo formáu por Letícia González (voz y percusión) y Rubén Bada (guitarres lletriques) que deconstruye y reinterpreta la música tradicional asturiana por aciu la fusión de preseos tan distintos como la pandereta y la guitarra lleutrica.
L’oxetivu de L-R ye faer una llectura personal de la música asturiana calteniendo los ritmos tradicionales pal baille pero incluyendo otros soníos másaveraos al blues, jazz o rock. La resultancia ye un apueste novedosu qu’ellos mesmos bautizaron como post -folk o post- trad.

Redaición InfoAsturies

This work is licensed under a Creative Commons Attribution 4.0 International License.