El coleutivu Marches de la Dignidá llama a la población asturiana a manifestase en defensa de los drechos de los pensionistes, más del 30% de la población asturiana, de la que dependen económicamente munches families
Seique protexer el drechu a unes pensiones dignes “agora y nel futuru” ye’l llema principal d’esta movilización, el llistáu de reivindicaciones d’esti colectivu ye muncho más ampliu: defender los servicios públicos, como la sanidá y l’enseñanza pente otros, denunciar la situación de probeza de más del 30% de la población y l’aumentu de la probeza na reciella, desixir un trabayu y un salariu dignu, el drechu a la vivienda y una prestación curiosa al traviés d’una renta básica, lluchar escontra la represión, pidiendo amnistía y llibertá a toles persones deteníes, procesaes o multaes por lluchar-como’l casu de los 5 de Zarréu o Aitor, encausáu por realizar pintaes-, protestar escontra la desigualdá na aplicación de la xusticia …
Son munches les reivindicaciones pero pueden resumise fácilmente: esta manifestación llama a los asturianos a amosar públicamente la so indignación pola continua perda de drechos. “Salimos a la cai p’amosar una realidá que quier escondese y pa amosar la solidaridá colos que carecemos los efeutos de les polítiques capitalistes que, utilizando la crisis como escusa, confisquen drechos y riqueza a les clases populares y trabayadores en beneficiu d’una minoría privilexada.”
Dende’l nacioanlismu d’izquierda tamién se sofiten eses marches por más que critica’l calter centralista de les convocatories, pero qu’atalanta que la gravedá de la situación obliga a xuncir esfuercios. Les caberes declaraciones del presidente del estáu español, presentando como un mal menor inevitable la perda de poder adquisitivu de los pensionistes y la recién sentencia absolutoria a la familia real nun faen sinón añedir más lleña a esti fueu.
La concentración va tener llugar esti sábadu a los dolce del mediudía na Plaza del Carmen de Xixón
This work is licensed under a Creative Commons Attribution 4.0 International License.
