El nacionalismu aragonés, al igual qu’el del restu de los pueblos del estáu, vivió una década marcada pola puxanza del movimientu españolista más esacerbáu y pola irrupción d’una zorga istitucionalista que, creando fuertes espeutatives, incumplió les sos promeses, desencadarmando la participación ciudadana
Na década que trescurrió dende la so dixebra de la Chunta Aragonesista, el partíu soberanista aragonés Puyalón creó les bases pa l’articulación d’un movimientu independentista de zorgues n’Aragón, conformando un espaciu políticu propiu alredor de dos cuetiones básiques ya innegociables: independencia y socialismu.
Si daqué hai que destacar de la trayeutoria d’esti partíu ye la so capacidá de cambéu y adaptación, pasando d’una corriente d’opinión a un movimientu sociopolíticu, y d’ende a la so configuración como partíu, con numberosos cambeos organizativos qu’atribúin a la riqueza ideolóxica de la militancia y a una continua reflexón para ameyorar los planteamientos.
Na valoración que faen d’estos diez años destaquen la situación especialmente contraria que, n’Aragón como en Asturies, carecen nesti intre los procesos identitarios, debío sobremanera a la presión de los medios de comunicación y al supremacismu español, “col colofón autoritariu nes esibiciones de la seronda pasada col procés catalán”.
Pa un futuru inmediatu planteguen una reencadarmación de la organización que pase pol abandonu de los amplios frentes elleutorales colos que participaren n’anteriores elleiciones, desengañaos de les sopes de sigles y de la collaboración con organizaciones d’ámbitu español, acusando a “La medrosa izquierda istitucional” d’incumplir “quedando en papel moyáu munches de les cuestiones que son parte del nuesu ADN políticu”
Pa la organización queden inda munches cuestiones pindies: el retu futuru d’entamar llistes propies pa los comicios nacionales, la costrución del movimientu popular como base de too, superar el cortoplacismu xeneral y trabayar en tolos ámbitos nos que’l pueblu aragonés amuese la so soberanía: feminismu, LGTB+, vertebración rural, ecoloxismu. “Tou en plural, namás asina vamos tar nel camín d’exercer l’autodetermín”.
Redaición InfoAsturies
This work is licensed under a Creative Commons Attribution 4.0 International License.
