La mítica cervecería, conocía en tol escenariu célticu européu pol so ambiente y los sos conciertos, ñació de la man de la música, pero la política de Llicencies y Urbanismu aplicada por Somos Uviéu torgó dende’l 2015 la cellebración de conciertos nel llocal, llevándolu al preslle
Anque primeramente aseguróse que la prohibición de conciertos yera “daqué puntual”, el conceyal responsable, Ignacio Fernández del Pandorial declaró que “les actuaciones en direutu en dellos locales d’esti conceyu son un problema ensin resolver dende va años” y anunció que, acatando la normativa española vixente nesta materia, l’actividá musical que venía desenvolviéndose nel Ca Beleño tornábase nuna infración.
Tres les primeres denuncies, el propietariu del llocal, Frank Delgado, xunió a hosteleros y músicos nun movimientu para tratar de camudar la Llei d’Espeutáculos Públicos qu’apiguró en redol a ellos a numberosos coleutivos: vecinos, Universidád d’Uviéu, Abogaos Mozos, Informadores Turísticos, Asociaciones culturales y profesores del Conservatoriu desixeron el desbloquéu d’esta situación, pero enagora los entueyos para poder ufiertar música en directu siguen.
L’actual llexislación dexa a los llocales debidamente insonorizaos emitir ensin llende música grabada fasta 90dB, pero prohibe coles mesmes cualquier volume de música en direutu que nun cumpliera una llarga serie de trámites, lo que llevó a amenorgar asgaya los conciertos en direutu, sobremanera n’Uviéu, onde la midía ta aplicándose con especial rigor.
La situación perxudica descomanadamente al ámbitu de la cultura musical asturiana, una y bones estos conciertos en llocales hosteleros son el principal mediu al traviés del que pueden dase a conocer les nueves formaciones musicales. El preslle del Ca Beleñu, amás, afecta bien especialmente a la redolada del celtismu asturianu, que pierde asina’l so principal puntu d’alcuentru.
Nel casu concretu del Ca Beleñu, depués del conciertu final del 17 de fabreru, el proyeutu va reñacer el mes de marzu nuna nueva fábrica pa la so cerveza Ordum, nel antiguu balneariu de Borines, onde van entamar ensin tantos problemes conciertos, tasties, demostraciones o xornaes.
Llucía F. Marqués
This work is licensed under a Creative Commons Attribution 4.0 International License.
