Una plataforma integrada por numberoses organizaciones y coleutivos concentróse ayeri na Escandalera (Uviéu) y n’otros once países pa protestar contra los ataques a la llibertá d’espresión y la folada de represión desamarrada contra periodistes, artistes, tuiteros, humoristes y escorríos poles sos opiniones, les sos creaciones artístiques o les sos informaciones crítiques
La plataforma señala que más de 20 artistes de tou tipu enfréntense anguañu a condenes de prisión o elevaes multes pol fechu d’exercer la so llibertá d’espresión. Los sos delitos fueron denunciar la brutalidá policial en cargues contra manifestantes, opinar contra la élite corrupta que nos gobierna y la monarquía franquista que la dirixe, o declarar la so indignación contra tolos atropellos ya inxusticies que se cometen na nuesa sociedá al amparu de la so ‘llegalidá’, “la llegalidá de los empresarios y esplotadores, qu’apliquen con mano de fierro contra los que menos tienen”
Acusen al Estáu español d’aplicar como norma la represión sistemática contra cualquier disidencia política, especialmente si esta, gracies a les nueves teunoloxíes de comunicación, puede llegar a un públicu ampliu y francer el silenciu qu’imponen los grandes periódicos, la radio y la televisión, toos güei, según denuncien los organizadores, al serviciu del réxime.
“Ante la situación actual” aportunen, “onde diariamente s’executen desfiucios, onde les sos reformes llaborales condérguennos a sangrantes xornaes, al paru y a la precariedá. Ante’l constante encarecimientu del costu de la vida y nun afaciendo esa xubida a salarios y pensiones, a la privatización de los servicios públicos etc. contestamos con aiciones na cai y denunciamos nes redes. L’Estáu pretende acallantar estes denuncies cola so represión”
Los organizadores de la protesta recuerden que güei van a por ellos, pero mañana podemos ser cualesquier, animando al pueblu asturianu a encadarmase y dar una respuesta coleutiva. Na concentración desixeron l’absolución inmediata y l’amnistía total pa tou represaliáu, censuráu y acosáu por exercer la so llibertá d’espresión y por participar na protesta social.
Redaición InfoAsturies
This work is licensed under a Creative Commons Attribution 4.0 International License.
