La defensa de los drechos llingüísticos nos conceyos asturianos tien dos focos principales estos meses. Bimenes y Noreña tan na diana y tan viendo como s’intenta torgar que se doten d’unes ordenances municipaes d’usu de la llingua, que garanticen estos derechos a la so vecindá y afonden na normalización social del idioma
Los ataques abanderaos pol PP contra les Ordenances d’Asturianu lleguen per dos víes distintes, anque l’oxetivu seya’l mesmu: que los conceyos nun regulen l’usu del asturianu. Nesti sen, Mercedes Fernández, cabezalera del PP n’Asturies, foi clara cuando anunció públicamente que’l so partíu diba trabayar pa que nun s’aprueben ordenances municipales d’usu del asturianu.
Bimenes aprobó en Plenu esta selmana, por unanimidá, recurrir la suspensión de la so ordenanza aprobada’l primeru de xunu de 2017, coincidiendo cola Fiesta de la Oficialidá. L’ataque a la ordenanza de Bimenes llega per vía gubernamental y ye frutu de l’aición de la Delegación del Gobiernu español n’Asturies, con Gabino de Lorenzo al frente. La primera aición ye l’unvíu d’una petición al Conceyu menanciando con aniciar midides llegales si nun se dexa sin efectu l’alcuerdu plenariu pol cual s’aprueba la ordenanza reguladora.
Bimenes nun dobló y nun anuló motu propio la ordenanza y el gobiernu español dio’l siguiente pasu, Abogacía del Estáu, al traviés del Tribunal Superior de Xusticia d’Asturies, unvía un requerimientu con unes midides cautelares que na práutica sospenden la normativa yerbata. Con esta situación, la defensa de la so ordenanza y con ella de los drechos llingüísticos nel ámbetu municipal de los sos vecinos pasa por plantegar llucha xurídica recurriendo’l requerimientu y les medides. Asina lo entendieron tolos grupos con representación, incluyíu el PSOE.
Casu distintu ye’l de Noreña onde’l Plenu Municipal aprobó la so ordenanza el 26 d’abril de 2016 con 9 votos a favor, los de tolos grupos quitando los tres ediles del PSOE y la del PP. Nun primer momentu, tamién recibe la notificación de Delegación de Gobiernu pidiedo l’anulación del alcuerdu pero, nesti casu, nun siguió alantre la vía gubernamental. Esta decisión nun debió cayer bien nel PP de Noreña, y Luis Miguel Suárez González, exconceyal de la formación y presidente de la cofradía gastrómica “Caballeros de la Orden del Sabadiego”, presentó un recursu, nun principiu a nivel personal, pero que tres ser almitíu pol TSXA, convirtióse n’aición del PP n’Asturies al más altu nivel.
El Tribunal argumentaba la so decisión d’anular l’alcuerdu en que les ordenances suponíen una declaración d’oficialidá, al usar la espresión “xunto al castellán” pa referise a la llingua propia de Noreña, asina como la falta d’un informe de sostenibilidá financiera que, dende la aprobación de la denomada “Llei Montoro”, sedría preceptiva anque de puru trámite dao que ye evidente qu’una ordenanza d’esti calter nun pon en pelligru la sostenibilidá y estabilidá del Conceyu. El 13 de febreru finaba’l plazu pa presentar un recursu de casación pero, depués d’analizar la situación, Noreña nun lu presentó y optó por iguar la situación presentando una ordenanza nueva cuando la sentencia firme dexe esta ensin vigor. Si bien la parte referente a la llingua propia considerábase recurrible, la falta del informe facía difícil que pudiere prosperar y tendría un costu económicu. Qué pasará con esta nueva tramitación de la Ordenanza en Noreña ye una incógnita, pero too apunta a que, per una vía o per otra, el PP va siguir atacando.
Tanto en Bimenes como en Noreña parez que la llucha polos drechos llingüísticos va siguir dando muncho que falar nos prósimos meses, tan na llínia del frente. La situación ye surrealista. Per un llau, la Llei d’Usu y Promoción faculta a los conceyos a tomar midides pa garantizar la efectividá de los drechos llingüísticos que nella se recueyen nel so ámbitu, pero la falta d’oficialidá nun trai más que problemes llegales. Per otru, el PP nun quier nin ordenances, nin oficialidá y fexo del ataque al idioma asturianu y a los derechos llingüísticos bandera política.
Paralelamente, bien de conceyos tan aprobando nos sos Plenos pidir a la Xunta Xeneral que reforme l’Estatutu y faiga oficial l’Asturianu. Noreña y Bimenes tampoco nun se queden atrás nesti movimientu pola oficialidá y onde Bimenes ye un faru dende qu’allá a finales del sieglu XX declaró la oficialidá nel so territoriu, aniciando una cadena de declaraciones que foron un fitu na reivindicación lligüística asturiana.
Toño Martínez
This work is licensed under a Creative Commons Attribution 4.0 International License.
