Una planta de formigón , otra de tremaos asfálticos y una más de fabricación de formigones ya industria estrautiva son los proyeutos que tan en marcha

La Coordinadora Ecoloxista d’Asturies solicita a la Conseyería d’Infraestructures, Ordenación del Territoriu y Mediu Ambiente, que paralice darréu el trámite de consultes ambientales pa la planta de formigón na cantera Carcaba, en Les Caldes (Uviéu) que ta abiertu a información dica’l 4 d’abril.

Consideren qu’esti proyeutu ruempe l’actual marcu llegal al tar tramitándose al tiempu 2 nueves istalaciones contaminantes que se sumen a la esistente, polo que los 3 proyeutos tendríen de sometese a evaluación d’impautu ambiental conxuntamente, pol criteriu d’apinamientu de proyeutos. Les otres dos istalaciones proyeutaes son la planta de tremaos asfálticos y la planta de fabricación de formigones ya industria estractiva.

Uviéu carez yá anguañu la mayor contaminación por bencenu’l país, procedente de la planta d’alquitrán  y la coquería qu’hai en Trubia, a la que se suma la contaminación producida pola cantera, bien cercana a les viviendes de Les Caldes, pa los que la nueva planta de formigón supón otra agresión ambiental, tantu no qu’afeuta a la calidá del aire como a contaminación acústica.

Redaición InfoAsturies

This work is licensed under a Creative Commons Attribution 4.0 International License.